ЦСКА ва Файзуллаев Европадан бўлаётган қизиқишга қандай жавоб берди?
Ўзбекистон миллий терма жамоаси ҳужумкор футболчиси Аббосбек Файзуллаев 2023 йилнинг август ойида “Пахтакор”дан Москванинг ЦСКА жамоасига кўчиб ўтгани ва Россия майдонларида ёрқин ўйин кўрсатаётганидан бери легионеримизни Европанинг қатор клублари кузатиб келади.
Хусусан, яқинда бир неча манбалар 21 ёшли ўзбек футболчисига Туркиянинг амалдаги чемпиони ва энг қудратли клуби “Галатасарой” жиддий қизиқиш билдираётгани ҳақида хабарлар тарқатилди.
- ЦСКА клубининг ҳужумкор футболчиси Аббосбек Файзуллаевга Туркия суперлигасининг гранд клуби “Галатасарой” жиддий қизиқиш билдирмоқда.
21 ёшли ўйинчи жорий мавсумда ЦСКА клуби сафида ҳам, Ўзбекистон миллий терма жамоасида ҳам муҳим роль ўйнаяпти. 2024 йил декабрда Аббос Осиёда “Йилнинг энг яхши ёш футболчиси”, совринига лойиқ топилди. Унинг ЦСКА билан тузилган шартномаси 2026 йил июнь ойида якунланади.
Бу маълумотларни вазиятга яқин манба тасдиқлади, - деб ёзди Markaj News канали.
Бу хабарни таҳлил қилган бир неча экспертлар турк суперклуби Файзуллаевни жамоанинг ёши ўтиб қолаётган юлдузларидан бири – бельгиялик Дрис Мертенс ўрнига олиб келмоқчи экани ҳақида ўз фикр-мулоҳазаларини билдирди.
Маълум бўлишича, 36 ёшли Дрис Мертенснинг амалдаги шартномаси 30 июнь куни тугайди ва “Галатасарой” ҳамкорликни узайтирмасликка ва бельгиялик футболчи ўрнига ўйин услуби айнан уникига ўхшайдиган Аббосбек Файзуллаевни олиб келишни мақсад қилган.
Ушбу маълумотлар тарқатилганидан бир неча кун ўтиб, ЦСКА раҳбарияти ва Аббосбек Файзуллаевнинг ўзи “Галатасарой” қизиқиши ҳақидаги саволларга жавоб қайтарди.
- Аббос, “Галатасарой” ҳақидаги хабарларга қандай муносабат билдирасан?
- Бу ҳақида гапиришни истамайман. Чунки бунинг мавриди эмас. Ҳозир ЦСКА билан шартномам бор ва трансферлар ҳақида гапириш клубга нисбатан ҳурматсизлик бўлади.
Айни пайтда бор эътиборимни ЦСКАга қаратганман, - деди Аббосбек Файзуллаев.
Ўз ўрнида, ЦСКА бош директори Роман Бабаев ҳам “Галатасарой”нинг ўзбек футболчиси қизиқаётгани ҳақидаги хабарларга қуйидагича изоҳ берди.
- Шунисини аниқки, худди сизлар каби “Галатасарой”нинг Файзуллаевга қизиқаётганини интернетдан ўқидим. Ҳеч қандай аниқлик йўқ, бирор маротаба алоқага чиқишгани йўқ. Қишки трансферлар даврда ҳам Файзуллаев бўйича ҳеч қандай мурожаатлар бўлмаган эди, - деди Роман Бабаев.
Аббосбек Файзуллаев ЦСКА сафида 2023 йилнинг ёзидан бери барча турнирларда олтмишда учрашувда иштирок этиб, рақиблар дарвозасига саккизта тўп киритган ва жамоадошларига 21 та голли пас узатган. Унинг шартномаси 2026 йилнинг ёзигача амал қилади.
Transfermarkt портали 21 ёшли ҳужумкор футболчини 8 миллион еврога баҳоламоқда. Файзуллаев бу кўрсаткич бўйича Абдуқодир Ҳусановдан кейин Марказий Осиёнинг энг қимматбаҳо иккинчи футболчиси ҳисобланади.
Фикрлар