Туркия президенти Ражаб Тоййиб Эрдўған Кантенинг трансферига ёрдам берди

Туркия президенти Ражаб Тоййиб Эрдўған яқинда Н'Голо Кантенинг Истанбулнинг "Фенербаҳче" клубига ўтишига сабабчи бўлди.

"Ўз номимдан ва клуб номидан президент Эрдўғанга футболчининг муваффақиятли трансферини қўллаб-қувватлагани учун миннатдорчилик билдираман. Бу "Фенербаҳче"га ҳам, умуман Туркия футболига ҳам фойда келтиради", - дея клуб президенти Садеттин Сараннинг сўзларини келтиради Истанбул клуби матбуот хизмати.

Эслатиб ўтамиз, сўнгги бир-икки йил давомида франциялик машҳур хавбек Саудия Арабистонида "Ал-Иттиҳод" сафида тўп сурган эди. Бунгача жаҳон чемпиони ва икки карра Англия чемпиони Англияда "Лестер" ва "Челси" клубларида тўп сурган. Ҳозирда Канте 34 ёшда.

"Фенер" Туркия чемпионатида 46 очко билан 2-ўринда бормоқда. "Галатасарой"дан ортда қолиш - уч очко.