"Турон" уч нафар янги футболчи билан шартнома имзолади. Уларнинг орасида ЦСКА тарбияланувчиси ҳам бор

Про лигага қайтган “Турон” клуби яна катта иштиёқ билан Суперлигага йўлида астойдил ишга киришган. Биласиз, Анвар Бердиев клубда расман бош мураббий сифатида тасдиқланди.

Айни пайтда селекция ишлари ҳам давом эттирилмоқда. Яқинда Марлен Чобанов билан келишувга эришган клуб яна айрим янги ўйинчилар билан ҳам шартномалар тузди.

“Турон” матбуот хизматининг хабар беришича, Тожикистон ёшлар терма жамоаси аъзоси, ҳужумкор ярим ҳимоячи Шариф Раҳматов “Турон” билан расмий шартномага имзо чекди.

Маълумот учун, Шариф Раҳматов 2002 йилда туғилган, ҳозирда 19 ёшда. Ампуласи - ҳужумкор ярим ҳимоячи. Ёш футболчи бугунга қадар Тожикистоннинг "Истиқлол" клубида ўйнаб келган. Бундан ташқари, Раҳматов Тожикистон ёшлар терма жамоасига номзод футболчи саналади.

Бундан ташқари, Москванинг ЦСКА клуби академияси тарбияланувчиси Сиёвуш Хабибуллоев билан ҳам расман шартнома имзоланди.

Сиёвуш Хабибуллоев 2002 йил 11 ноябрда туғилган, ҳозирда 19 ёшда. Ампуласи - ҳимоячи. Ёш футболчи бугунга қадар Россиянинг "Сочи", "Краснодар", шунингдек Тожикистоннинг "Истиқлол" клублари ёшлар жамоаларида ўйнаган. Қолаверса, Хабибуллоев Россия U-17 ёшлар терма жамоаси сафида ҳам майдонга тушган.

Шу билан бирга яқинда “Турон” сафига қўшилган ҳимоячи Хушнуд Авилов ҳам яйпанликлар билан бир йиллик шартнома имзолади. Ўтган мавсумни у “Навбаҳор”да ўтказганди. “Турон”га келгунига қадар Авилов маълум муддат “Бухоро”нинг йиғинларида ҳам иштирок этди. Якунда футболчи янги мавсумни “Турон” сафида ўтказадиган бўлди.