U19 Ўзбекистон терма жамоаси Тошкентдаги йиғинни якунлади

Тимур Кападзе бошчилигидаги 23 нафар футболчидан иборат терма жамоамиз кунига 2 маҳалдан машғулотлар олиб борди.

МТЖ бош мураббийи Вадим Aбрамов ҳамда жисмоний тайёргарлик бўйича мураббий Мирко Еличич ушбу йиғин давомида мураббийлар штабига кўмак бериб борди.

Йиғин якунида терма жамоамиз вакиллари Биринчи лиганинг “Нефтгазмонтаж” клуби билан назорат учрашуви ўтказди. Aслиддин Тоштемиров томонидан киритилган ягона гол якунда Ўзбекистон U19 вакилларига ғалаба олиб келди.

Маълумот ўрнида, 2020 йилги U19 Осиё чемпионатига Тошкент, Олмалиқ ва Наманган шаҳарлари мезбонлик қилади. Чемпионат баҳслари аввал белгиланганидек 14-31 октябрь кунлари бўлиб ўтиши режалаштирилган.

Юртимизда ташкил этиладиган ушбу мусобақа учун қуръа ташлаш маросими 18 июнь куни ўтказилади. Терма жамоамиз қуръа ташлаш жараёнида турнир мезбони сифатида 1-саватчадан ўрин олади. Ушбу саватчада шунингдек Саудия Aрабистони, Жанубий Корея ва Қатар мамлакати жой олган.