Ушбу кунда: Муроджон Аҳмадалиев, Исроил Мадримов ва Шаҳрам Ғиёсов...

2018 йил 24 ноябрь куни Америка Қўшма Штатларининг Нью Жерси штатидаги "Hard Rock & Kazino" аренасида професcионал бокс оқшоми бўлиб ўтган эди. Ушбу кеча Россиянинг RCC ва "Мир Бокса" промоутерлик компаниялари томонидан ташкил этилган бўлиб, унда ўзбекистонлик 3 боксчи рингга кўтарилганди.

55 кг вазн тоифасида Муроджон Аҳмадалиев  5-профессионал жангини ўтказган ва ўзининг WBA Inter-Continental камарини америкалик Айзек Заратадан ( 16-3-3, 2 КО ўша вақтда)  ҳимоя қилган. Ўша пайтда Муроджон Аҳмадалиев WBА рейтингида учинчи, Айзек Зарата эса олтинчи поғонада эди. Ушбу жанг WBА элиминатор, яъни жаҳон чемпионлик камари учун саралаш жанги, дея эълон қилинганди. Жангда Аҳмадалиев рақибини 9-раундда техник нокаутга учратиб, жаҳон чемпионлик камари учун мажбурий даъвогарликни қўлга киритган.

Ушбу кечада истеъдодли боксчиларимиздан яна бири Исроил Мадримов ҳам ўз дебютини ўтказган ва илк уринишидаёқ, 10 раундлик жангда иштирок этган. Исроил Мадримовга супер ярим ўрта вазн тоифасида WBА Inter-Continental камари учун кечган баҳсда Владимир Хернандес (10-2 ўша вақтда) рақиблик қилганди. Жангни тўлалигича ўз назоратида олиб борган Мадримов рақибини 6-раундда техник нокаутга учратиб, илк жангидаёқ WBА минтақавий камарини қўлга киритганди.

 "Мир Бокса" промоутерлик компанияси билан энг биринчи бўлиб шартнома имзолаган Рио Олимпиадаси кумуш медаль соҳиби Шаҳрам Ғиёсов ҳам ўзининг 6-жангини ушбу кечада ўтказган. Унга анчагина тажрибали бўлган мексикалик Мигель Замудио (41-11-1 ўша вақтда) рақиблик қилган эди. Жанг атига 19 сония ичида якунланди. Шаҳрам Ғиёсовнинг танага йўллаган кучли зарбасидан сўнг, рақиб ўрнидан тура олмайди ва Ғиёсов ўзининг 6-ғалабасида 5-нокаутини қайд этган.

Жалол Аҳмедов тайёрлади