Усик фаолиятидаги рекорд вазнда кикбоксинг устасига қаши рингга чиқади

Жаҳон чемпиони Олександр Усик шанба куни бўлиб ўтадиган Рико Верхувенга қарши чемпионлик жанги олдидан фаолиятидаги энг оғир вазнда тарозига чиқди. Бироқ у шунга қарамай рақибидан қарийб 11 килограмм енгил бўлиб қолмоқда.

Украиналик боксчи Мисрдаги машҳур Гиза пирамидалари этагида кикбоксингдан боксга ўтган Верхувенга қарши рингга кўтарилади. Жангда WBC камари ўртага қўйилади.

Усикнинг вазни 106 килограммни ташкил қилди. Бу унинг ўтган ёзда британиялик Даниэль Дюбуани муддатидан аввал мағлуб этган пайтдагидан 3 килограммдан ортиқроқ вазн ҳисобланади.

39 ёшли чемпион мутлақ фаворит ҳисобланишига қарамай, рақибини жиддий қабул қилаётганини таъкидлади.

- Мен бунга осон пул ишлаш имконияти, деб қарамаяпман. У ҳақиқий жангчи, - деди Усик.

У ҳар доимгидек хотиржам кайфиятда бўлиб, ушбу жангдан кейин яна икки марта рингга чиқишни режалаштираётганини ҳам маълум қилди.

37 ёшли Верхувен эса 117 килограмм вазнда тарозига чиқди. Бу унинг профессионал боксдаги иккинчи жанги бўлади. Илк баҳси эса бундан 12 йил аввал ўтказилган.

Нидерландиялик спортчи ўзини ишончли ҳис қилаётганини билдирди.

- Ўзимни жуда яхши ва ишончли ҳис қиляпман. Бокс оламига тўлиқ мослашиб бўлдим, - деди Верхувен.

Шу тариқа, жанг олдидан ҳар икки спортчи ўзининг юқори тайёргарлик ҳолатида эканини намоён қилди. Энди бокс мухлислари Гиза пирамидалари этагидаги катта тўқнашувни интиқлик билан кутмокда