Vadim Abramov: Jamoam yaxshi o‘yin ko‘rsatmadi, buni tan olaman

«Al Ayn» - «Bunyodkor» (1:0) uchrashuvidan keyingi matbuot anjumanida mehmonlar bosh murabbiyi Vadim Abramov ishtirok etdi. Bu haqda klub matbuot xizmati xabar berdi.

- Nima deyishim mumkin? Doim shunday bo‘lib kelgan. O‘zbekistonda mavsum boshlanmagani jamoa o‘yiniga ta’sir qiladi. Bugun ham shunday bo‘ldi, jamoam yaxshi o‘yin ko‘rsatmadi, buni tan olaman. Raqib bizga qaraganda yaxshiroq ko‘rindi. Shunday bo‘lsa-da, bu safar ham faqat ijobiy natijadan umid qilgandik. 

Musobaqani OFK o‘tkazadi. Biz esa taqvimni hurmat qilgan holda maydonga tushamiz. Agar taqvim noto‘g‘ri desam, bu bahona bo‘lib qolishi mumkin. Lekin rostini aytganda mavsum boshlanmagani baribir rol o‘ynaydi. Mag‘lubiyat futbolchilarning ruhiyatiga ta’sir qilmaydi. Ta’sir qilgan taqdirda ham O‘zbekistonda yangi mavsum 28 fevraldan boshlanadi. Ungacha jamoa o‘ziga kelib oladi, - dedi Vadim Abramov.