Венгернинг фикрича, фақат битта терма жамоа Францияга ЖЧ-2026 ни ютишга халал бериши мумкин

«Арсенал» клубининг собиқ бош мураббийи, ҳозирда ФИФАнинг футболни глобал ривожлантириш бўлимига раҳбарлик қилаётган Арсен Венгер 2026 йилги жаҳон чемпионатидаги асосий даъвогарлар ҳақида фикр билдирди.

Унинг таъкидлашича, келаси жаҳон биринчилигида ғалаба қозониш эҳтимоли энг юқори жамоа — Франция.

«Менимча, Франция жаҳон чемпионатида ғолиб чиқади. Биламан, сизлар: “Албатта, сен шундай дейсан, чунки французсан”, деб ўйлашингиз мумкин. Лекин агар бу жаҳон чемпионатини таҳлил қиладиган бўлсак, ҳозир футбол поезди маълум бир тезликда кетаётганини кўрамиз. Унга мослаша олган жамоаларгина унга “миниб олишга” қодир. Масалан, осиёлик терма жамоалар мусобақадан эрта чиқиб кетди, чунки ўйинлар шиддати ва темпига дош бера олмади. Рақобатлаша олиш учун уларга техник жиҳатдан етарли даражада тайёргарлик етмади», — дея таъкидлаган Венгер.

Унинг сўзларига кўра, Франция учун асосий хавфли рақиб — Испания.

«Мен учун энг катта савол — бу Испания. Агар ҳозир кимдир Францияни мағлуб эта олади, десам, бу — Испания бўлади. Чунки уларнинг техник маҳорати Францияникидан юқорироқ», — дея Венгернинг фикрларини "Mirror" нашри келтиради.