Виржил ван Дейк Ўзбекистон билан ўйиндан олдин Нидерландия терма жамоаси таркибини баҳолади

Нидерландия терма жамоаси ҳимоячиси Виржил ван Дейк 2026 йилги жаҳон чемпионати учун шакллантирилган таркиб ҳақида фикр билдирди.

- Бу галги таркибдан кўп футболчилар “Евро-2024”да қатнашган, шунинг учун уларда қимматли тажриба бор. Уларнинг аксарияти учун бу илк йирик турнир эди. Ҳозир уларнинг кўпчилиги ўз фаолиятининг энг яхши даврида. Шунингдек, кўп футболчилар Чемпионлар лигаси даражасидаги жуда йирик клубларда ўйнайди.

Аммо мен учун ҳамиша ҳаммаси бир нарсага бориб тақалади: гап буюк футболчиларга эга бўлишда эмас, балки энг яхши жамоага эга бўлишда. Биз жамоа ва мураббийлар штаби сифатида муваффақиятга эришиш учун энг яхши формулани топишимиз керак.

Шу таркиб билан жаҳон чемпионатида ғолиб бўлишга ишонамиз. Бизда жуда аҳил жамоа  шаклланган ва мен бунга ҳақиқатан ҳам ишонаман. Фақат бироз омад ҳам керак бўлади. Айрим футболчилар ҳал қилувчи вазиятларда ўзини кўрсатиши, шунингдек жароҳатлар бўлмаслиги лозим. Айниқса, ҳозирги кунда ўйинлар сони жуда кўп эканини ҳисобга олсак.

Буларнинг барчаси муҳим аҳамиятга эга. Аммо таркибимизга ва нималарга эриша олишимизга қараганимда, ҳақиқатан ҳам алоҳида натижа қайд этишимиз мумкинлигига ишонаман, - деди Виржил ван Дейк ФИФА расмий сайтига берган интервьюсида.

Нидерландия терма жамоаси 8 июнь куни жаҳон чемпионати дебютанти Ўзбекистон миллий терма жамоаси билан ўртоқлик ўйинида майдонга тушади.