Витинья: Умид қиламан, эртанги кун Модрич учун янада ғамгинроқ бўлади

Португалия терма жамоаси ярим ҳимоячиси Витинья 2026 йилги жаҳон чемпионати 1/16 финал босқичида Хорватияга қарши ўйин олдидан рақиб жамоа сардори Лука Модрич ҳақида фикр билдирди. "Пари Сен-Жермен" футболчиси хорват юлдузи унинг учун намуна эканини таъкидлади, бироқ шахсий ҳурмат ва симпатиялар барибир жамоавий мақсадлардан паст туришини қайд этди.

"Модрич — мен учун қаҳрамон. Унга қарши майдонга тушганман, ўйиндан кейин футболка алмашганмиз. Лекин ўзимни унга ўхшатиш ёки ўхшамаслигим ҳақида гапиришни ёқтирмайман. Эртага унинг куни бизникига қараганда анча ғамгинроқ бўлишини истайман", — дея Витинья сўзларини ESPN келтиради.

26 ёшли ярим ҳимоячи мазкур турнирда Португалия терма жамоасининг барча учрашувларида майдонга тушди. Португалия K гуруҳида иккинчи ўринни эгаллаб, плей-оффга йўл олди ва 1/16 финалда L гуруҳини иккинчи поғонада якунлаган Хорватияга қарши ўйнайди. Бу жуфтликда ғалаба қозонган жамоа 1/8 финалга йўл олади.