Хави чемпион бўла олмаслигини тан олди

Испания Ла Лигаси 32-туридан ўрин олган баҳсда "Барселона" ўз майдонида "Кадис"га имкониятни бой берди - 0:1. Беллашувдан сўнг каталонияликлар бош мураббийи Хави ички чемпионатда чемпион бўлиш имконияти йўқолганини тан олди.

"Бундан жаҳлим чиқди, биз ўзимизни танқид қилишимиз керак. Биринчи навбатда, бу менга тегишли. Бизнинг олдимизда Чемпионлар лигасига чиқиш вазифаси турибди. Ғазабдаман, бизга қатъият етишмади. Чемпионлик имкониятини деярли йўқотдик.

Беллашувдан сўнг шогирдларимнинг кайфиятини кўтардим, улар хафа. Ҳимоя ва ҳужумдаги ҳаракатларимизни таҳлил қиламиз. "Реал Сосьедад"га қарши баҳсга қадар хулоса чиқаришимиз лозим. Умуман олганда, вазиятимиз ёмон эмас. Турнир жадвалидаги ўрнимиз ноябрдагидан анча яхши.

Лекин бу "Барселона" ва биз доим энг яхшисини мақсад қилишимиз шарт",-деди испаниялик мутахассис.