Холанднинг "Реал"га қачон ўтиши очиқланди

Дортмунднинг «Боруссия» клуби президенти Ханс-Йоахим Ватцке «Манчестер Сити» ҳужумчиси, норвегиялик юлдуз Эрлинг Холанднинг келажаги ҳақида фикр билдирди.

«Эрлинг Холанд Мадриднинг «Реал» жамоасини яхши кўради ва буни яширмайди. Ўйлайманки, икки-уч йилдан сўнг у албатта у ерда тўп суришни бошлайди. Лекин ҳозир эмас. Унинг «Реал»даги вақти ҳали келади», — дея Ватцкенинг сўзларини AS нашри келтиради.

Эслатиб ўтамиз, Норвегия терма жамоаси тарихида илк бор жаҳон чемпионати чорак финалига йўл олди ва бу босқичда Англияга қарши майдонга тушади. Холанд ҳисобида мусобақанинг тўрт учрашувида етти гол ва бир голли узатма мавжуд.

Ўтган мавсумда ҳам Эрлинг клуб даражасида юқори натижа қайд этди: 25 ёшли ҳужумчи барча мусобақалар доирасида 52 ўйинда майдонга тушиб, 38 гол урди ва тўққиз бор ҳамжамоаларини голга чиқарди. 

«Манчестер Сити» билан тузилган шартномаси 2034 йил ёзигача амал қилади. Интернет-портал Transfermarkt маълумотларига кўра, футболчининг тахминий трансфер қиймати 200 миллион евро атрофида баҳоланмоқда.