Хулиан Альварес "Барселона" бўйича баёнот бериши мумкин

Мадриднинг "Атлетико" клуби ва Аргентина терма жамоаси ҳужумчиси Хулиан Альварес яқин соатларда муҳим баёнот билан чиқиши мумкин.

Аввалроқ 26 ёшли футболчи жаҳон чемпионати доирасида Австрияга қарши ўйиндан сўнг "Барселона"га ўтиш истагини оммага маълум қилиши мумкинлиги ҳақида хабарлар тарқалган эди. Бу маълумотни Mundo Deportivo нашри ҳам тасдиқламоқда. Манбага кўра, Альварес "Барса"га эҳтимолий трансфери борасида очиқ баёнот бериш ҳақида жиддий ўйлаб кўрмоқда.

Шу билан бирга, футболчи ўз сўзлари жамоадошлари ва мухлислар томонидан эгоистик қадам сифатида қабул қилиниб қолишини истамайди. Шу сабабли у бундай баёнотни фақат "альбиселесте" ғалаба қозонган тақдирдагина эълон қилишни кўриб чиқмоқда.

Маълумотларга кўра, "Барселона" аллақачон "Атлетико" ҳужумчиси учун 100 миллион евро таклиф қилган, аммо мадридликлар бу таклифни кескин рад этган.