Хушхабар! Ўзбекистон крикет федерацияси халқаро кенгаш аъзосига айланди

Жорий йилнинг 26 июль куни Буюк Британиянинг Бирмингем шаҳрида Халқаро Крикет Кенгаши (ICC)нинг навбатдаги конгресси бўлиб ўтди.

Мазкур конгрессда крикет бўйича бажарилаётган ишлар сарҳисоб қилинди. Конгресс регламентига мувофиқ, крикет ривожланаётган мамлакатларнинг ICCга аъзолик масалалари ҳам муҳокама қилинди. Қувонарлиси, ушбу конгрессда Ўзбекистон крикет федерацияси томонидан амалга оширилаётган ишлар муҳокамага қўйилди ва бир овоздан халқаро крикет кенгашининг аъзолигига қабул қилинди. Шундай қилиб Ўзбекистон крикет федерацияси Халқаро крикет кенгашининг (ICC) аъзолик рўйхатига 106-давлат сифатида қабул қилинди.

Халқаро крикет кенгашининг (ICC) конгрессида иштирок этган Ўзбекистон крикет федерацияси раиси Азиз Михлиев шундай дейди: "Авваламбор мустақил Ўзбекистон фарзанди сифатида айтишим мумкинки, давлатимиз раҳбари, ҳурматли Шавкат Мирзиёев ташаббуси саъй-ҳаракатлари билан бугун ҳар соҳада, жумладан, жисмоний тарбия ва спортга яратилаётган имкониятлар беқиёс. Шу боис, спортчиларимиз юртимиз байроғини дунё ареналарида кўз-кўз қилишмоқда. Ўзбекистон крикет федерацияси ҳам Халқаро крикет кенгашининг аъзосига айланди ва ушбу муносабат билан барча юртдошларимизни, спортчиларимизни муборакбод этаман.

Умид қиламанки, Ўзбекистон крикетчилари ҳам яратилаётган кенг имкониятлардан фойдаланиб, крикет бўйича халқаро мусобақаларда ватанимиз шарафини муносиб ҳимоя қилишади.

Эслатиб ўтамиз, Халқаро крикет кенгаши (ICC)нинг Осиё мамлакатларида крикетни ривожлантириш бўлими бошлиғи, олий тоифали халқаро эксперт, жаноб Иқбол Сикандер ва ICCнинг молиялаштириш ишлари менежери Нитеша Котарийлар 11-13 июль кунлари Тошкентда бўлишиб, ЎКФ фаолияти билан яқиндан танишиб, хулосаларини халқаро крикет кенгаши (ICC) раҳбариятига тақдим этишганди.