"Хюистра жамоани оғир аҳволда қолдирди, зўр трансферларни кўрмадим, Темиров клубдан кетишни ўзи истади" - "Пахтакор"нинг ғалабасидан кейин Жаъфар Ирисметов билан мулоқот

“Пахтакор” клуби 27 февраль санасида Ўзбекистон Суперкубогида “Насаф” устидан минимал ҳисобда устун келиб, совринни ўзиники қилиб олди. Шу тариқа, “Шерлар” янги мавсумга юқори кайфиятда киришмоқда.

“Пахтакор” янги мавсум учун яхши тайёрланди, кутилган ва кутилмаган ўзгаришлар гувоҳига ҳам айландик-а? Мураббийдан тортиб, футболчиларгача янгиланди. “Пахтакор”нинг “Насаф”га қарши бўлиб ўтган ўйинидан кейин клубнинг спорт директори Жаъфар Ирисметов Sports.uz сайтига турли мавзуларда ўз муносабатини билдирди.

“Насаф” чемпионликка даъвогарлардан бири бўлиб қолаверади”

- Шубҳасиз, янги футбол мавсумини мана шундай Кубок билан бошлаш ниҳоятда ёқимли. Фақат “Пахтакор” эмас, барча жамоаларга ҳам бундай ҳол ёқимли бўлади. Ўйин ҳақида нима десам бўлади? Ўйлайманки, майдонда иккита тенг кучли жамоалар куч синашишди. Ўйин услублари ҳам, бошқа жиҳатлари ҳам “Насаф”ники билан ўхшашиб кетади. Бу рақиб йилдан-йилга кучайиб боряпти. Ўзининг таркибини сақлаб қолган ва уларга қўшимча равишда янги легионерларни ҳам қўшган. Шу боисдан ўйлайманки, бу гал ҳам “Насаф” чемпионлик учун даъвогарлардан бири сифатида қолаверади. Шуни айтишим керакки, бу иккала жамоага жорий йилдаги биринчи расмий учрашув бўлгани учун майдонда футболчилар эҳтиёткорлик билан ўйнадилар. Лекин биз кичкина ҳисобда ғалаба қозондик. Албатта, буни ҳақли ғалаба, деб ўйлайман.

жаъфар3

“Янги мураббийни жамоа билан танишув жараёни давом этяпти”

- Чемпионатга тайёгарлигимизнинг бошланиши биз учун яхши кечмади. Нимага деганда, Питер Хюистра жамоани бироз оғир аҳволда қолдириб қўйди. Чунки у 3 январда келаман, деб келмади. Натижада биз тезкорлик билан янги мураббий топишга тушдик ва Славче Войнескини чақирдик, у билан шартнома имзоладик. Шундан кейин у ёғи яхши кетди, деб ҳисоблайман. Янги мураббий жамоани “Насаф”га қарши биринчи ўйинини кўрди. Ҳозирда жамоа билан танишув жараёни кетяпти, деб ҳисоблайман. Бу мураббий ярим йил ичида “Пахтакор”да янада яхши жамоа шакллантира олади, деб ўйлайман.

жаъфар1_1

“Таркибимизга жуда яхши ўйинчиларни жалб қилдик”

- Умуман олганда, “Пахтакор”ни олдинги йилга нисбатан кучсизланди, деб ҳисобламайман. Қайтанга, таркибимизга жуда яхши ўйинчиларни жалб қила олдик. Янги келганлардан Икром Алибоев, Сардор Рашидов жамоамизни кучайтирди. Ларин, Хаджиев кабилар ҳам яхши савияда. Уларнинг жамоага қўшилиб кетиш жараёни давом этяпти. Оливер Шаркичда ҳам мослашиш ҳолати кетяпти. Барча қўлга киритган футболчиларимиз кучли. Миржаҳон Мираҳмадов ҳам биз учун жуда керакли футболчи. Ҳамма чизиқларни кучайтиришга ҳаракат қилдик. Барибир яна бир-иккита позицияларимизни кучайтириш ниятидамиз, келажакда.

жаъфар5

“Шерзод Темиров кейинчалик “Пахтакор”га қайтишини айтди”

- Шерзод Темиров масаласига келсак, унинг ўзи кетишни жуда-жуда хоҳлади. Шунинг учун бу футболчи билан хайрлашишимизга тўғри келди. Шерзод кейинчалик “Пахтакор” клубига қайтиб келишини таъкидлади. У ўзини хориж жамоасида синаб кўришни хоҳлади. Биз Темировнинг истагини тўғри тушунган ҳолда қўйиб юборишга қарор қилдик.

жаъфар4

“Қолган жамоалар ҳам сюрприз бўлиши мумкин”

- Менимча, “Сўғдиёна” катта шов-шувли трансферларга қўл урмади. Аммо, барибир жиззахликлар яхши ҳолатда. Шунингдек, “Қизилқум” ҳам кучайди. “Насаф”, “Навбаҳор” кабиларни ҳам айтишим мумкин. Лекин селекция бўйича бирор нарса айтишим қийин. Асосан ўзимизни чемпионатдаги футболчилар у клубдан-бу клубга кўчиб ўтишди. “Вау” деган трансферларни кўрмадим. Тўғри, “Навбаҳор”га Рустам Ашурматовнинг қўшилиши менимча яхши трансфер бўлди, деб ўйлайман. Чунки Рустам терма жамоа аъзоси. Боя айтганимдек, “Қизилқум” ҳам яхши трансфер қилди. Улуғбек Бақоевни эса “Сўғдиёна” ўйинида ўз имзоси бор. Улар ҳам бизга рақобатчи бўлади. Барча клублар кучайди, десак бўлади. “Нефтчи” ҳам яхши футболчиларни олди. Масалан, биздан у ерга ўтган Аброр Исмоилов ҳам кучли футболчи. Қолган жамоалар ҳам сюрприз бўлиши мумкин. Бу йилги чемпионат жуда қизиқ бўлади, деб ўйлайман.

 

Фикрлар

Фикр қолдириш учун авторизациядан ўтинг!