Ямал бир зарба билан рекорд ўрнатди

Испания чемпионатининг учинчи турида Ла Лиганинг амалдаги ғолиби “Барселона” сафар учрашувида “Райо Вальекано” меҳмони бўлиб, 1:1 ҳисобида дуранг ўйнади.

Каталонияликлар ҳужумкор футболчиси Ламин Ямал 40-дақиқада пенальтидан тўп киритиб, ҳисобни очди. Бу гол Ламиннинг номини тарихга ёзилишига сабаб бўлди.

Opta статистика марказининг маълум қилишича, Ламин Ямал Ла Лига тарихида XXI асрда пенальтидан гол урган энг ёш футболчига айланди. Шу куни у 18 ёшу 49 кунлик эди.

Таъкидлаш жоизки, Ламин Ямал барча турнирларни қўшиб ҳисоблаганда “Барселона” таркибида биринчи бор 11 метрлик нуқтадан зарба берди.

Ямал илгари фақатгина Испаниянинг турли ёшдаги терма жамоалари сафида халқаро учрашувларда пенальтини амалга оширган эди.