Ямалнинг отаси жанжалдан кейин “Реал”га мурожаат қилди

Испания чемпионатининг ўнинчи туридан ўрин олган “Реал” ва “Барселона” ўртасидаги учрашувда мадридликлар ашаддий рақиб устидан  2:1 ҳисобида зафар қучди.

“Сантьяго Бернабеу” стадиони мезбонлик қилган бу баҳс ҳар икки жамоа футболчиларининг ўзаро жанжали билан якунланди.

Аслида ўйин давомида мезбонлар Ламин Ямалга эътирозларини очиқчасига кўрсатди. “Реал” сардори Даниэль Карвахал ва Винисиус Жуниор учрашув тугаши билан рақиблар етакчиси Ламин Ямални сиқувга олди.

Гап шундаки, ўйин олдидан Ламиннинг “Реал” ҳақида айтган гаплари мадридликларга ёқмаган эди.

Ламиннинг отаси Амминур Насруи юзага келган зиддиятдан кейин ўғлини ҳимоя қилиб, “Реал” футболчиларига мурожаат қилди.

- Унинг атиги 18 ёш экани сизнинг омадингиз. Ҳали Барселонада кўришамиз, - деб ёзди Ямалнинг отаси ижтимоий тармоқдаги саҳифасида.