Яна легионерга айланган Ғофуров: "Ўзимиздан ёқадиган таклиф бўлди, аммо бироз кеч қолишди"

Аввал хабар берганимиздек, ҳамюртимиз Асрор Ғофуров яна легионерга айланди. У собиқ клуби – Бангладешнинг “Башундхара” жамоасига қайтди. Футболчи деярли икки йил мобайнида ушбу жамоада тўп сурган. Ўтган йили ёзда эса юртимизга қайтди ва “Қизилқум” шарафини ҳимоя қилди. Жорий йилга келиб Асрор яна Бангладешдаги жамоасига қайтди. Шартнома имзолангач, Ғофуров Sports.uz сайтига интервью берди.

-  Асрор яна Бангладешдаги собиқ клубингизга қайтибсиз. Бу трансфернинг амалга ошишида асосий ташаббускор ким ва сиз қандай фикрдасиз?

- Тўғри, яна Бангладешга, собиқ жамоамга қайтдим. Асосий ташаббускорлик жамоадан бўлди. Клуб менга яна астойдил қизиқди. Бангладешга келишимни жиддий хоҳлашди.

- “Қизилқум”даги ярим мавсумлик фаолиятингиз ўзингизга ёқдими?

- “Қизилқум”даги ярим мавсум яхши ўтди, деб ўйлайман. Ҳали Ўзбекистон Суперлигасида муносиб ўйнай олишимни исботладим. Бемалол қониқарли ўтди, деб айта оламан.

- Нега юртимизда қолмадингиз ёки ўзингизга ёқадиган таклиф бўлмадими?

- Ўзбекистондан таклифлар бўлди. Ўзимга ёқадиган таклиф ҳам бор эди. Фақат ўша ўзимга манзур келган таклиф Бангладеш клуби билан шартнома имзолаганимдан кейин бўлди. Ўзбек клуби озроқ кеч қолди.

- Нега 5 ойлик шартнома имзоладингиз? Кейинги режангиз бошқами?

- 5 ойлик шартнома тузганимнинг сабаби у ерда иккинчи давра бошланади ва июнь ойида чемпионат тугайди.

- Бангладешда сизни қандай қарши олишди? Ўтган вақт давомида жамоангизда эътиборли ўзгаришлар борми?

- У ерда мени жуда очиқ юз билан кутиб олишди. Мени кўриб хурсанд бўлишди. Ҳақиқатан ўзгаришлар катта. Олдин жамоа беш йил давомида чемпион бўлиб келган. Ҳамма ғалабаларга эришган. Лекин бу йил ишлари унчалик яхши кетмаяпти. Ҳозир чемпионатда учинчи ўринда боряпти. Шу боис ёрдамга келдим, десам ҳам бўлади.

- Бу фаолиятингизга ортага ташланган қадам эмасми?

- Тўғриси, ҳеч қачон бирор чемпионатга ўтсам, сира орқага ташланган қадам деб ҳисобламаганман. Чунки ҳар бир қадам ўйланиб босилган қадам бўлади. Орқага ёки олдинга ташланган қадамлигини у ерга бориб ўйнагандан кейин биласиз. Бангладешда уч йил ўйнаганимдан сўнг Ўзбекистон Суперлигасига қайтиб ўзим учун муносиб қатнашдим, деб айтишим мумкин.