Яхшибоев ортидан “Шахтёр”нинг чемпион таркиби тарқалиб кетди

Беларусь чемпионатининг сўнгги мавсумида Слигорскнинг “Шахтёр” жамоаси ўн беш йиллик танаффусдан сўнг, ўз тарихида иккинчи бор мамлакат чемпионалигини қўлга киритганидан хабарингиз бор, албатта.

Ўзбекистонлик легионер Жасур Яхшибоев порлаган “Олий лига-2020” баҳсларида чемпион жамоа охирги тур учрашувларининг сўнгги дақиқаларида аниқлангани ҳам Беларусь чемпионати қизғин ва кескин курашлар остида ўтганидан далолат бермоқда.

“Шахтёр” таркибида чемпион бўлганига қарамай, Жасур Яхшибоев кутилмаганда жамоани тезда тарк этди. Ўзбекистонлик легионери жамоага чемпионат олтин медаллари топширилган тақдирлаш маросимини ҳам кутгани йўқ. Кейинчалик, ҳамюртимиз ортга қайтиш учун чипта олиб қўйгани туфайли бу тадбирларда қатнашмаганини очиқлади. Бироқ, Беларусдаги манбалар Жасур “Шахтёр” муҳитига қўшилиб кета олмаганини ва жамоа етакчиларидан бири билан уришиб қолганини ёзганди.

Нима бўлган тақдирда ҳам, “Шахтёр”даги ўйинлар Жасур Яхшибоевнинг фаолиятида ёрқин давр бўлиб қолаверади. Бироқ, бу жамоа янги мавсум олдидан жиддий муаммоларга дуч келди. Мамлакатнинг энг қудратли клуби БАТЭни рақобатда ортда қолдирган таркиб Яхшибоев кетганидан кейин деярли тарқалиб кетди.

dd8daca2d7c441621843bd40e637f44d-resize_crop_1Xquality_100Xallow_enlarge_0Xw_1200Xh_630

Беларуснинг энг нуфузли нашри ҳисобланган “Прессбол”нинг ҳабар беришича, чемпион жамоани Жасурбек Яхшибоев, Артём Архипов, Дарко Бодул, Жуниор Кабананга ва Эдуард Вишняков каби асосий таркиб ўйинчилари тарк этиб улгурган.

- Яхшибоев ва Архиповнинг кетгани “Шахтёр”нинг қудратини сўндириб, жамоани сезиларли даражада кучсизлантирди. Ўзбек футболчиси юртига қайтиб кетди, Артём эса “Тамбов”га борадиган бўлди, - деб ёзмоқда “Прессбол”.

Шунингдек, ярим ҳимоя вакилларидан Александр Селява, Диего Сантос,  Артём Соловья, ҳимоячилардан Игорь Бурко, Максим Бордачев ва Урош Чосич ҳам Солигорск жамоаси билан ҳамкорлик қилмайдиган бўлди.

Маълумотларга қараганда, кетганлар сафи янада кенгаяди. Ҳимоячилардан Александр Сачивко ва Никола Античга бошқа жамоалардан жиддий чорлов бўляпти. Хорватиялик ярим ҳимоячи Тин Вукманич ҳам тез орада Латвияга кетиб қолиши мумкин.

Таркиби тарқалиб кетаётга “Шахтёр” янги футболчиларни таклиф қилишга шошилмаяпти. Ҳозирча, биргина янги ўйинчи келди. Ўтган мавсумда “Городея” жамоаси шарафини ҳимоя қилган дарвозабон Сергей Черник ўз бахтини Солигорскда синаб кўришга рози бўлган. Шунингдек, “Шахтёр” асосий рақобатчиси БАТЭ етакчиси бўлган Игорь Стасевич ва унинг жамоадоши Егор Филипенконинг трансферини ижобий ҳал қилгани айтилмоқда.

Бундан ташқари, солигорсклар ҳимоянинг ҳар икки қанотида ўйнай оладиган “Белшина” ҳимоячиси Владислав Соланович, “Славия”нинг универсал ярим ҳимоячиси Глеб Шевченко, албаниялик ярим ҳимоячи Валон Аҳмадий ва гамбиялик ҳужумчи Дембо Дарбони олишни режалаштиряпти.

“Шахтёр” янги мавсумда мамлакат чемпионати ғолиби сифатида Европа чемпионлар лигасида иштирок этиши лозим. Янгиланган таркиб бу ишни қай даражада уддалашини вақт кўрсатади.

Солигорскликларнинг чемпионлигиги муносиб ҳисса қўшган Жасур Яхшибоев эса, ҳозирча фаолиятини қаерда давом эттириши бўйича расмий хабар йўқ.

Фикрлар

Фикр қолдириш учун авторизациядан ўтинг!
Jasur Nabijonovich
08/01/2021 08:50
Teper islichuvt Jasur keriny na Rusia