"Зўр ўйинларимни кўрсатишга сўз бераман" - "Андижон"даги Арвеладзенинг Шота Арвеладзега қандай алоқаси бор?

Бу йил “Андижон” клубига бир қатор янги легионерлар таклиф қилинди. Уларнинг орасида ярим ҳимоячи Леван Арвеладзе ҳам бор. Бу ном эшитилиши биланоқ табиийки, ўз-ўзидан Шота Арвеладзе ёдимизга тушиши бор гап.

Леван ҳам номига яраша ўзидан илиқ таассурот қолдириш ҳаракатида меҳнат қиляпти. Футболчи билан суҳбатни эса унинг фамилиясидан бошладик. 

- Леван, фамилиянгиз машҳур. Айтинг-чи, ўша ҳамма билган Шота Арвеладзе билан бирор-бир қариндошчилик жойингиз борми?

- Ҳа, менинг фамилиям жарангдор янграйди, бу рост. Эҳтимол, қариндошлик алоқамиз баъзида чалкаш хулосани чиқариши мумкиндир. Балки қариндошлигимиз бор гапдир, бироқ тўғридан-тўғри эмас. Хуллас, мен ўз фамилиямни ўзим намойиш этиб келяпман.

- Ушбу таниқли фамилиядан зарурат туғилганида бирор ишни битириш учун фойдаланган пайтларингиз ҳам бўлганми?

- Йўқ, мен футболдаги ўз кўникмаларимдан ва номимдан фойдаланишни афзал кўраман. Аммо, айтганча, Грузияда Арвеладзе фамилияси эшитилиши биланоқ бу фамилия ўз-ўзидан ишлашга тушиб кетиши бор гап!

- Леван Арвеладзе – бу грузинча ном. Лекин сиз Украина фуқаролигига эгасиз. Нима учун?

- Ҳа, мен Грузияда - Тбилисида туғилганман. 13 ёшимда мени Украинага таклиф қилишган ва футболни айнан ўша ерда ўйнашни бошлаб юборганман. Ўшандан бери фаолиятимниг аксар қисми Украина чемпионати билан чамбарчас боғланиб кетган, десам муболаға бўлмаса керак.

- Ўзбекистон чемпионатидан олган дастлабки хулосаларингиз билан ўртоқлашсангиз!

- Яхши таассурот, яхши стадионлар ва айниқса, мухлисларга гап йўқ. Улар стадионларда ажойиб муҳитни юзага келтирадилар. Ҳаммаси қизиқарли, бироқ устида ишлаш керак бўлган жиҳатлар ҳам йўқ эмас.

- “Андижон” таклифини қабул қилишингизда биринчи навбатда нима асосий туртки бўлди?

- Тўғри, гоҳида ҳаётимга қандайдир янги ўзгаришлар киритиш ҳақида ўйлаб қолардим. “Андижон” вакиллари менга тўғридан-тўғри алоқага чиқдилар. Бундай нарсалар эса мени бефарқ қолдирмайди.

- Табиийки, мухлисларнинг сиздан умиди катта. Шундай экан, ишқибозларга қандай гапингиз бор?

- Маҳаллий ишқибозларнинг меҳрини қозониш учун бор имкониятимни ишга соламан ва ўзимнинг энг зўр ўйинларимни кўрсатишга сўз бераман.

- “Андижон” клуби ҳозирча 6 та учрашувнинг 2 тасида ютди ва 4 тасида ютқазди. Бунга қандай муносабат билдира оласиз?

- 4 та ўйинда шунчаки ютқаздик, дея олмайман. Аксинча, биз оёқларимизда мустаҳкам турдик ва ўйинларни ютиш учун охиригача курашдик. Албатта, хатолар устида ишлаймиз ва ўйинимизни янада ўстиришга ҳаракат қиламиз. Бўлажак ўйинларда мухлисларимиз кўз ўнгида буни исботлаш учун астойдил ҳаракат қиламиз.

- Ўзбекистонда ҳаммадан кўра сизга кўпроқ нима ёқяпти?

- Табиийки, биринчи навбатда паловни танлайман! Шуни алоҳида таъкидлашим керакки, бу ернинг одамлари ўта самимий ва меҳмондўст.

- Сизга олдин ҳам юртимиздан таклифлар бўлганми?

- Ҳа, музокаралар олиб борилган, лекин охир-оқибат таклифлар менда алоҳида қизиқишни уйғотмаган.

Шуҳратбек Жўраев.