9 nafar bokschimiz ringga chiqadigan tarixiy jang kechasiga muxlislar kiritiladimi?

Xabaringiz bor, 3 aprel kuni hamyurtimiz Murodjon Ahmadalievning WBA va IBF kamarlarini himoya qilish uchun bo‘lib o‘tadigan jangi Toshkent shahrida bo‘lib o‘tadi. Shuningdek, ushbu kechada yana 8 nafar bokschimiz professional boksdagi navbatdagi bellashuvlarini o‘tkazadi. Bugun ushbu nufuzli sport oqshomiga bag‘ishlangan matbuot anjumani bo‘lib o‘tdi. 

Unda Markaziy Osiyo tarixida ilk bor tashkil etilayotgan ushbu shouga muxlislar kiritilishi muhokama qilindi. Bu boradagi savolga MOQ Bosh kotibi Oybek Qosimov javob berdi:

"Yodingizda bo‘lsa, "Humo Arena"da bo‘lib o‘tgan "Katta dubulg‘a" turniriga, dastlab, muxlislar kiritilishiga ruxsat berilmagandi. Lekin biz muzokaralar o‘tkazib, bunga muvaffaq bo‘ldik. Hozirgi kunda Sog‘liqni saqlash vazirligi bilan gaplashmoqdamiz. Biroq, amin bo‘lishingiz mumkinki, o‘sha kuni albatta ishqibozlar bo‘ladi. Xudo xohlasa, o‘zimizning bokschilarni qo‘llab-quvvatlash imkoni bo‘ladi", - dedi Qosimov.