Adrien Raboning "Milan"ga o‘tishiga onasi to‘sqinlik qilmoqda

Frantsiyalik xavbek Adrien Raboning "Milan"ga ehtimoliy transferi to‘xtab qoldi. Sabab – futbolchining onasi va agenti Veronik Rabo.

Eslatib o‘tamiz, "Marsel" xavbekni jamoadoshi Jonatan Rou bilan yuz bergan mojarodan keyin transfer ro‘yxatiga qo‘ygan va uning uchun 15 million evro talab qilmoqda.

"La Gazzetta dello Sport"ning xabar berishicha, "Milan" xavbekka kamida ikki yillik shartnoma va soliqlardan keyin yiliga 5–6 million evro maosh taklif etmoqchi. Biroq, klub futbolchining onasi bilan to‘g‘ridan-to‘g‘ri aloqa o‘rnata olmagan. Veronik Rabo esa o‘g‘lining Italiyaga ko‘chishini istamayapti va uning "Marsel"da qolishi mumkinligiga ishonadi.

"Marsel" esa futbolchidan rasmiy, hatto yozma tarzda uzr so‘rashini talab qilmoqda. Ammo klub xavbek bu qadamga borishiga ishonchi komil emas.

Shu bilan birga, "Milan" transfer oynasi yopilgunga qadar Raboni olish bo‘yicha harakatni to‘xtatmaydi.