"Akron" bosh murabbiyi: "Sherzod Esanovda katta potentsialni ko‘ryapman, u serqirra futbolchi"

Yaqinda hamyurtimiz Sherzod Esanov “Andijon” klubidan Rossiyaning “Akron” jamoasiga transfer qilinganini yaxshi bilasiz. Iqtidorli yarim himoyachining faoliyatida katta sakrash bo‘ldi va u ilk bor Rossiya premer-ligasida to‘p suradi.

Legionerga aylangan Sherzod yangi klubida 25-raqamda o‘ynaydi. 2-turda safarda “Fakel”ga qarshi bellashuvda Esanov o‘yin qaydnomasiga kiritildi. U zaxiradan joy oldi. “Akron” esa ilk g‘alabasini qo‘lga kiritdi – 2:0. Chempionatning ilk turida esa "Akron" "Lokomotiv"ga 3:2 hisobida imkoniyatni boy bergan.

“Akron” klubi bosh murabbiyi Zaur Tedeev ayrim savollarga javob berar ekan, hamyurtimiz Esanov to‘g‘risida ham to‘xtalib o‘tdi.

- Siz Voronej va Qozondagi safar o‘yinlarini o‘z ichiga olgan bir haftalik uchrashuvlarga Tula orqali yo‘l olishga qaror qildingiz. Nima uchun shunday yo‘l tutdingiz?

- Bu logistika nuqtai-nazaridan biz uchun muhim. Vaziyatdan foydalangan holda Tulaning “Arsenal” klubi rahbariyati, shaxsan mening do‘stim bosh murabbiy Aleksandr Storjukga alohida minnatdorchilik bildirib qolaman. Biz yaxshi shart-sharoitlarga ega bo‘lgan joyda juda munosib mashg‘ulotlar o‘tkazdik.

- “Akron”ning Rossiya premer-ligasidagi debyut o‘yini haqida o‘zingizga qanday xulosalarni chiqarib oldingiz?

- Hammasi biz uchun juda tez ro‘y berdi. Vaziyatga tezkor baho berish, qarorlarni shunga mos ravishda qabul qilish, taktik va texnik elementlarni tezlik bilan amalga oshirish va o‘yindagi shunga mos maqom ham yuqori. Shu bois futbolchilarimiz vaziyatga moslashishga juda qiynalishdi. Ammo har qanday holatda ham bunga ko‘nikmoq kerak. Jamoani darhol qurib bo‘lmaydi. “Lokomotiv”ga qarshi uchrashuv biz uchun dastlabkisi bo‘ldi va o‘zimizga juda ko‘plab xulosalarni chiqarib oldik. Yig‘inlar chog‘ida bir qator sabablarga ko‘ra bunday jiddiy sparring-raqiblarga qarshi to‘p sura olmagandik. Birinchi uchrashuvdan xulosa chiqardik va butun e’tiborimizni “Fakel”ga qarshi bahsga qaratdik. “Fakel” – butunlay boshqa jamoa. Unga boshqacha tayyorgarlik ko‘rish kerak. Umid qilamanki, yangi o‘yinga yaxshi holatda etib boramiz.

- Kuni kecha jamoa safiga Sherzod Esanov kelib qo‘shildi. Bu futbolchini qanday rol uchun taklif qildingiz? Esanovning o‘yinchilik sifati “Akron”ga RPLda qay tariqa yordam berishi mumkin? Nima sababdan aynan unga to‘xtaldingiz?

- Uni bizga selektsion xizmatimiz xodimlari tavsiya qildilar. Menga Esanovning o‘yini yoqdi. Shuningdek, bu xususida boshqa murabbiylar bilan maslahatlashdim. Ya’ni, Esanovni yaxshiroq taniydiganlari bilan. Hozir o‘zbek futbolida ancha o‘zgarishlar ro‘y bermoqda. Nazarimda, o‘zbek futboli jadallik bilan rivojlanib bormoqda. Shu sabab o‘zbek o‘yinchilari RPLda tez-tez paydo bo‘lishmoqda. Men Sherzodda katta potentsialni ko‘ryapman. U etarli darajada serqirra futbolchi, garchi yosh bo‘lsa ham. U O‘zbekiston yoshlar terma jamoasi safida ancha vaqt to‘p surdi. Sherzodning ko‘rsatkichlari juda yaxshi. Uning kelishi bilan bizdagi o‘rta chiziqdagi raqobat ancha o‘sadi.

Shuhratbek Jo‘raev.