Ayollar futbolidagi kelishilgan o‘yinlar, hakamlar tomonidan “So‘g‘diyona-W”ga qilingan nohaqliklar — Feruza Boboxo‘jaeva bilan intervyu

Avvalo Assalom-u alaykum, yana bir bor. Intervyuga rozi bo‘lganingiz uchun rahmat. Savollardan oldin muxlislar uchun o‘zingiz haqida to‘liq ma’lumot bersangiz.

Assalom-u alaykum. Men Feruza Boboxo‘jaeva, Qashqadaryo viloyati Kasbi tumanida tug‘ilganman. “Sevinch” klubi tarbiyalanuvchisi hisoblanaman. Bu mavsumdan e’tiboran “So‘g‘diyona-W” jamoasida o‘ynayapman.

Bir necha yillar davomida “Sevinch”da o‘ynadingiz. U erda jamoaning asosiy tarkib futbolchisi bo‘lgansiz. Lekin bu mavsum “So‘g‘diyona”ga ko‘chib o‘tdingiz. Asosiy sabab nima?

O‘zimni boshqa jamoada sinab ko‘rishni istadim. Shuningdek, “So‘g‘diyona-W” menga moddiy tomonlama ham yaxshiroq shartnoma taklif qildi. Oila-a’zolarim va “Sevinch” rahbariyati bilan o‘zaro kelishgan holda jizzaxliklar taklifini qabul qildim. Hozirda “Sevinch” meni ortga qaytarishni istamoqda. Agar kelishuvga erisha olsak, kelasi mavsumdan yana sobiq klubimga qaytishim mumkin.

Ayollar oliy ligasi yakunlanishigi ikki tur qoldi. “So‘g‘diyona-W” hozircha ikkinchi o‘rinda, lekin “Bunyodkor-W” sizlarga qaraganda bitta kam o‘yin o‘tkazgan. Jamoaningning kumush medallar uchun imkoniyatini qanday baholaysiz?

Hozirda “Bunyodkor-W” bilan oramizdagi farq bir ochkoni tashkil qiladi. Sababi ular bizdan bitta kam o‘yin o‘tkazgan. Agar ular o‘sha o‘yinda g‘alaba qozonsa, bizdan ikki ochkoga ilgarilab ketadi. Imkoniyatlar o‘z qo‘limizda emas. Albatta hakamlar bizdan 7 ochkomizni tortib olmaganda, hozir vaziyat boshqacha bo‘lar edi. Umuman olgan-da, hozir ham yomon emas. 

Aynan qaysi o‘yinlar va hakamlar qanday xatoga yo‘l qo‘ygan?

Oliy liga 17-turi doirasidagi “Qizilqum-W”ga qarshi o‘yinda hakam noto‘g‘ri qarorlar chiqardi. Ya’ni uchrashuv davomida raqib darvozasiga penalti belgilanishi kerak edi. 20-turdagi “Sevinch”ga qarshi o‘yinimizda ham shunga o‘xshash holat yuz berdi. Hakam bizni ikkita penaltidan mosuvo qildi. Shuningdek, Laylo Tilovova qizil kartochka olishi kerak edi. Biroq hakam qarshiliklar futbolchisini maydondan chetlatmadi. AGMKga qarshi o‘yinda ham yaqqol penalti berilmadi. Umuman olganda bu mavsum hakamlar bizning zararimizga ishlaydigan ko‘plab qarorlar chiqardi. To‘g‘ri, hakamlarning bu ishi o‘rganib chiqilib, ulargan chora ko‘rildi. Ammo bu bizga yo‘qotilgan ochkolarimizni qaytarib bermaydi.

O‘zbekistonda ayollar futboliga e’tibor qanday?

2022 yildan boshlab ozgina e’tibor karatila boshladi, chunki O‘zbekistonda ayollar futbolchi endi rivojlanib kelmokda. Oldinlari ichki chempionatimizda legionerlar bo‘lmas edi. Hozirgi kunda esa “So‘g‘diyona” hamda “Sevinch” jamoalarida legionerlar harakat qilmoqda. Agar bizga shunaqa e’tibor kuchayib boraversa, Xudo xoxlasa yildan yilga ayollar futboli ham o‘sib boraveradi va biz ham shunga yarasha natijalarga erishamiz deb o‘ylayman.

O‘zbekistonning turli yosh toifasidagi jamoalarida o‘ynagansiz, lekin ko‘p hollarda asosiy jamoadan chetda qolmoqdasiz

Albatta, men O‘zbekston U16, U19 jamoalarida o‘ynaganman. Qolaversa, O‘zbekiston terma jamoasida ham bir qancha uchrashuvlarda maydonga tushganman. Avgust oyida “So‘g‘diyona-W” xalqaro musobaqada qatnashishi kerak edi. O‘shandan oldingi yig‘inlarga meni taklif qilishgan, biroq jarohatim bo‘lgani sababli unda qatnasha olmaganman. “So‘g‘diyona- W”ning ayollar Osiyo chempionlar ligasidagi ishtirokidan keyin boraman deb niyat qilgan edim, biroq o‘shandan keyin jamoaga taklif bo‘lmadi. Balki, taklif bo‘lsa, yana O‘zbekiston terma jamoasi safida harakat qilarman?!

O‘zbekiston terma jamoasi bosh murabbiyi Minori Honda haqida fikringiz qanday, u bilan kerakli natijalarga erisha olamizmi?

Men hozircha Minori Honda bilan ishlab ko‘rmadim. Shuning uchun nimadir deb ayta olmayman. Lekin, mening fikrimcha, O‘zbekistonda undan yaxshiroq mutaxassislar bor.

O‘zbekistonning eng yaxshi futbolchilaridan birisiz, legionerga aylanish rejalaringizda bormi?

Albatta, legionerga aylanish niyatim bor. Hozirgi payt Turkiya va Gruziyaning ikki jamoasidan taklif bo‘lmoqda. Avval chempionatni tugatib olaylik, keyinchalik muzokara olib borishga harakat qilamiz.

Ayollar futbolida ham kelishilgan o‘yinlar bormi?

Albatta, ba’zi bir jamoalarda bor deb o‘ylayman. Biroq bu narsani hech kimga maslahat bermagan bo‘lar edim. Chunki buni futbolga, muxlislarga bo‘lgan xiyonat deb hisoblayman. Ishonamanki, o‘zbek futboli keyingi yillarda bunday illatdan to‘liq forig‘ bo‘ladi.

Feruza, muzmunli suhbat uchun rahmat. Keyingi o‘yinlarda siz va jamoaningizga omad tilaymiz.

Intervyuga taklif qilganingiz uchun sizlarga ham rahmat.

Jamshidbek Mahmudov suhbatlashdi