Iguain: Men ham, Pirlo va Ronaldo ham xoin emasmiz!

Argentinalik hujumchi Gonsalo Iguain 2016 yili “Napoli”dan ashaddiy raqib - “Yuventus”ga ko‘chib o‘tganidan pushaymon emasligini ta’kidladi.

O‘sha transfer tufayli neapollik muxlislar Iguainni hamon xiyonatda ayblab keladi.

- Men “Napoli”dan “Yuventus”ga kelganimdan pushaymon emasman. Men xoinmanmi? “River Pleyt”dan “Boka Xuniors”ga qanchasi o‘tganini bilasizmi? “Inter”dan “Milan” yoki “Yuventus”ga-chi? Muxlislar Pirlo, Ronaldo va boshqa ko‘p futbolchilarni ham xiyonatda ayblagan. Bu futbolning bir bo‘lagi.

Kelajakda men AQShda to‘p surishim mumkin. Hozir ko‘pchilik o‘sha tomonlarga ketmoqda. Hozir esa, “Yuventus” bilan yana bir yillik shartnomam bor.  Nima bo‘lishini endi ko‘ramiz, - dedi Gonsalo Iguain.

Iguain yakunlangan mavsumda 44 ta uchrashuvda 11 ta gol urib, sakkizta golli pas uzatdi.