Manchesterliklar "Chelsi" yulduzi transferi bo‘yicha kelishib oldi

«Manchester Yunayted» klubi «Chelsi» bilan yarimhimoyachi Andreya Santosni sotib olish bo‘yicha kelishuvga keldi. 

The Athletic nashri xabar berishicha, transferning kafolatlangan qismi 56 million evrodan oshib ketadi. Shartnomada yana 2 million evrodan ortiq miqdorda oson bajariladigan bonuslar ham ko‘zda tutilgan.

Manbaga ko‘ra, «Chelsi» kelgusida Santosni boshqa klubga sotishdan tushadigan summaning 10 foizini olish huquqini saqlab qoladi. 

22 yoshli futbolchi «Manchester Yunayted» bilan shaxsiy shartlari bo‘yicha kelishib olgan va transferni yakunlash uchun safarga chiqishga «Chelsi»dan ruxsat olgan.

Xabarlarda ta’kidlanishicha, «Chelsi» Santosni yuqori baholaydi, biroq futbolchining o‘zi asosiy tarkibda muntazam o‘ynashni istamoqda. Bu esa amalda qiyinroq ko‘rinadi, chunki yarimhimoyachi Moyses Kaysedo joriy yil aprel oyida klub bilan 2033 yilgacha mo‘ljallangan yangi shartnoma imzolagani sabab raqobat keskin kuchaygan.