Mirjalol Qosimov "Navbahor"ga qarshi o‘yindan keyin nimalar dedi?

Superliga 17-turidan o‘rin olgan “Navbahor” – AGMK (0:0) jamoalari o‘rtasidagi uchrashuvdan so‘ng o‘tkazilgan matbuot anjumanida mehmonlar ustozi Mirjalol Qosimov qatnashdi. Bu haqda "Navbahor" klub matbuot xizmati xabar berdi.

- Bugun chiroyli, jangovar o‘yin bo‘ldi. Ikki bo‘limda ham ochiq o‘yin guvohiga aylandik. Kim gol ursa, o‘sha jamoa yutib ketardi. Yigitlarimiz so‘nggi daqiqagacha harakat qilishdi, ammo yakunda baribir durang qayd etildi.

- Uchrashuv natijasidan qoniqdingizmi?

- Albatta, g‘alaba qozonganimizda yanada yaxshi bo‘lardi. Ikkala jamoa bir ochkodan oldi, boriga shukur. Qaytaraman, kimning omadi kelib gol urganida, o‘sha jamoa zafar quchardi.

- O‘tgan mavsumda AGMK bronza medalini qo‘lga kiritgandi. Bu yil jamoaning oldiga qanday maqsad qo‘yilgan?

- Biz har bir o‘yinda maydonga tushib, g‘alaba qozonishga harakat qilamiz va muxlislarga chiroyli o‘yin ko‘rsatish uchun o‘ynaymiz. Chempionat oxirida kim qaysi o‘rinda bo‘lishi ma’lum bo‘ladi. Oldimizga doimo oliy maqsadlar qo‘yamiz.