Oston Urunov O'zbekistonga qaytsa vodiyni qaysi jamoasiga boradi?

Эроннинг "Персеполис" жамоаси форварди - Остон Ўрунов SPORTS.uz сайти учун эксклюзив интервью берди! Суҳбат давомида, кўплаб инсайдлар ва футболчининг келажак режалари борасидаги фикрлари билан танишасиз. 

- Интервьюни бошида Мисрга урилган гол ҳақида сўрамасам бўлмайди. Жуда гўзал гол бўлди?! Изоҳлаб бера оласизми?

- Тўғриси, "Остонни ўзи ҳам ҳайрон қолди",-деб кўпчилик айтгани ҳайрон қолдирди. Мен бундан аввал Қирғиз Республикасигаям ҳудди шундай гол киритганман. "Бунёдкор" дарвозасига "Навбаҳор" либосида ҳам урганман. ОЧЛда, Эрон клубига ҳам бу ишни қила олганман. Ҳайрон бўладиган нарса йўқ эди бу ерда. 

Голга келадиган бўлсак, такрорий лавҳани кўрсангиз, у эпизодда шерикларимни кутадиган бўлсам, тўпни мендан олиб қўйган бўлишар эди. Шу боис, тезкор қарор қабул қилдим ва голни ижро этдим. 

Айни дамда, Ўзбекистонда бўлиб турибсиз. Тайёргарликлар қандай? 

- Ҳозир, Тошкентдаман. Формамни сақлаб туриш учун якка тартибда машғулотлар ўтказяпмиз. Эрондагиларни аксарияти шу ерда. Улар ҳам ўйин формасини тонусда ушлаб туриш учун машғулотларда тек тўкишмоқда. 

- Эронга қайтиш ниятингиз борми? 

- Мени "Персеполис" билан бир йиллик шартномам бор. Ҳозир, у ерда бироз нотинчлик бўлгани боис, эҳтиёт шарт Ўзбекистонга қайтдим. Барчаси тинчиб кетгунича, шу ерда бўлиб туришни афзал кўрдим. Ҳозир асосий мақсадим мундиалгача яхши спорт формани сақлаб туриш. 

- ПФЛ Эрондаги футболчиларимизни Ўзбекистонга қайтишига рухсат бергани ҳақида эшитган бўлсангиз керак. Эрондаги ҳолат, яқин 2-3 ой давомида яхшиланмаслиги мумкин. Бу вариантни ҳам кўриб чиқяпсизми? 

- Албатта, мен профессионал футболчи сифатида ҳар қандай кутилмаган воқеаларга руҳан тайёр бўлишим керак. Айни дамда, бир нечта вариантлар бор. 

- Мендаги маълумотлар тўғри бўлса, "Андижон" жамоаси сизни ўз таркибида кўрмоқчи? 

- Ҳа, айни дамда жамоани Самвел Бабаян бошқармоқда. У мураббий қўл остида анча мураккаб вазиятдан чиқиб кетганман. У кучли психолог ва яхши мураббий. "Навбаҳор" сафидаги ўйинларим орқали яна терма жамоага қайтишим ва футболчи сифатида қайта шаклланишимда у инсонни ўрни катта. 

Остон агар "Андижон" либосини кийсангиз, "Навбаҳор" ишқибозлари буни қандай қабул қилади деб ўйлайсиз? 

- Наманган халқи футболни жуда яхши кўради. Улар стадионда жон бергудек даражада бизни қўллаб-қувватлаган, чин мухлислардир, аммо ҳозирги қароримни ҳурмат қилишади деб умид қиламан. Футболчи жуда кўплаб факторлардан келиб чиқиб қарор қабул қилишга мажбур бўлади. "Лочинлар"нинг ишқибозлари мени доим илиқ кутиб олишига, ишонаман. Улар қалби кенг, мард ва танти инсонлар. Мен улардан ҳаётимдаги энг оғир даврларда ўзимга бўлган ишончимни қайтариб беришгани учун миннатдор бўлиб қоламан. 

- Келажак режаларингиз қандай?

- Аслида, ҳаммаси Худодан. Ҳозир "Персеполис" футболчисиман. Кўп нарса Жаҳон чемпионатига боғлиқ. У ерда ўзимни яхши кўрсатсам, вариантлар бўлиши аниқ. Албатта, клубимни рози қилиб, уларни қаноатлантирадиган сумма эвазига кучлироқ лигаларда тўп сурмоқчиман.