
O‘zbekistonda tug‘ilgan futbolchi “Evro-2024”da ishtirok etadi
Germaniya terma jamoasi bosh murabbiyi Yulian Nagelsmann 14 iyundan 14 iyulgacha ushbu mamlakatning o‘zida o‘tkaziladigan Evropa chempionatida ishtirok etish uchun milliy terma jamoa tarkibini e’lon qildi.
Bu galgi musobaqaga Brantd, Xummels, Goretska kabi mashhur o‘yinchilar jalb qilinmaydigan bo‘ldi.
Yulian Nagelsmann qit’aning eng nufuzli musobaqasida qatnashadigan charm to‘p ustalari qatorida O‘zbekistonda tug‘ilgan Valdemar Antonni ham kiritdi.
“Shtutgart” himoyachisi ilk marotaba joriy yilning mart oyida Germaniya terma jamoasidan chorlov olgan edi. Murabbiylar shtabining ishonchini oqlagan futbolchiga nufuzi musobaqada qatnashish imkoniyati berilmoqda.
Germaniya terma jamoasining Evropa chempionati uchun taqdim etgan tarkibi quyidagicha ko‘rinish oldi:
Darvozabonlar:
Manuel Noyer (“Bavariya”), Oliver Bauman (“Xoffenxaym”), Aleksandr Nyubel (“Shtutgart”), Mark-Andre ter Shtegen (“Barselona”, Ispaniya);
Himoyachilar:
Valdemar Anton, Maksimilian Mittelshtedt (“Shtutgart”), Benjamin Xenrixs, David Raum (“Leyptsig”), Yozua Kimmix (“Bavariya”), Robin Kox (“Ayntraxt”, Frankfurt-na-Mayne), Antonio Ryudiger (“Real”, Madrid, Ispaniya), Niko Shlotterbek (“Borussiya”, Dortmund), Jonatan Ta (“Bayer”);
Yarim himoyachilar:
Robert Andrix, Florian Virts (“Bayer”), Kris Fyurix (“Shtutgart”), Paskal Gross (“Brayton”, Angliya), Ilkay Gyundogan (“Barselona”, Ispaniya), Toni Kross (“Real”, Madrid, Ispaniya), Jamol Musiala, Aleksandr Pavlovich, Leroy Sane (“Bavariya”);
Hujumchilar:
Maksimilian Bayer (“Xoffenxaym”), Niklas Fyullkrug (“Borussiya”, Dortmund), Kay Xaverts (“Arsenal”, London, Angliya), Tomas Myuller (“Bavariya”), Deniz Undav (“Shtutgart”).
Eslatib o‘tamiz, Anton asli Toshkent viloyati Olmaliq shahrida tug‘ilgan. U 2013 yilda "Gannover" akademiyasiga borib qo‘shilgan va 2020 yilda "Shtutgart"ga ko‘chib o‘tgandi.
Joriy mavsumda Anton barcha turnirlarda 36 ta uchrashuvda qatnashib, bitta gol va to‘rtta assist muallifi bo‘ldi.
Valdemar Germaniya terma jamoasidagi debyutini Frantsiya terma jamoasiga qarshi o‘tkazilgan safar uchrashuvida nishonlagan.
Fikrlar