“Real” ichidan yemirlyapti, yetakchilar oʻrtasida ziddiyat kuchaymoqda

“Real Madrid”da joriy mavsumdagi omadsizliklar oqibatida kiyinish xonasida keskin muhit yuzaga kelgan, deb xabar bermoqda Footmercato.

Manba ma'lumotiga koʻra, natijalardan tashqari, klubni eng koʻp tashvishga solayotgan masala — ichki muhit. Evrokuboklardan chiqib ketilgandan keyin futbolchilar tushkun kayfiyatda va vaziyatga tan bergandek koʻrinmoqda.

Magʻlubiyatlardan keyin kiyinish xonasi “janoza muhiti”ni eslatmoqda, u yerda jamoani ortidan ergashtira oladigan haqiqiy yetakchilar yoʻq. Manbalar ta'kidlashicha, hatto mashgʻulotlar ham yashirin taranglik, koʻz qarashlardan qochish va aytilmagan ziddiyatlar joyiga aylangan. Jamoaning ayrim yetakchi futbolchilari oʻrtasida allaqachon kelishmovchiliklar boshlangan.

“Real Madrid” Chempionlar ligasi chorak finalida ikki oʻyin natijasiga koʻra Bavariyaga magʻlub boʻlgan edi. Ispaniya chempionatida jamoa ikkinchi oʻrinda bormoqda va peshqadam Barselonadan 11 ochko ortda qolmoqda.