Shatskix: Bizda hamma hujum qiladi

O‘zbekiston Superligasi 7-turidan o‘rin olgan OKMK - "Paxtakor" bahsi yakunlandi. Unda nominal mehmonlar  1:2 hisobida zafar quchdi. 

Olmaliqliklarning yagona goli Xurshid G‘iyosov nomiga qayd etildi. "Sherlar" safida Dragan Cheran va Aziz Turg‘unboev o‘z nomini tabloga yozdirib qo‘ydi.

Bellashuvdan so‘ng "sherlar" ustozi Maksim Shatskix matbuot anjumanida ishtirok etdi va o‘z fikrlari bilan o‘rtoqlashdi. 

- O‘yin kutganimizdek qiyin kechdi. Muxlislar ko‘plab chiroyli vaziyatlarga guvoh bo‘lishdi. Jamoalar yaxshi futbol namoyish qilishdi. Qosimov bu jamoani futbol o‘ynaydigan jamoaga aylantirgan. Bahsga jiddiy tayyorlandik, futbolchilar o‘z darajalarini ko‘rsatishdi. Birinchi bo‘limda barcha o‘ylaganlarimizni amalga oshira olmadik. Tanaffusda ba’zi o‘zgartirishlar qildik. Shundan keyin yaxshiroq o‘ynashga tushdik va golli imkoniyatlarimiz ko‘paydi. Qiyin bellashuvda muhim g‘alabaga erishdik.

- Bizda hamma hujum qiladi, hamma himoyaga o‘tadi. Qanotdagi futbolchi hujumga qo‘shilib, to‘pni uzatadi. Hujumdagilar esa to‘g‘ri pozitsiya orqali zarba berishi kerak. Jamoaviy o‘yin va alohida mahorat jamlanmasi bo‘lishi zarur. Bellashuv juda keskin kechgani tufayli o‘zgarishlarni amalga oshirmadim.