
Shomurodov va uning muxlislari xursand bo‘ladigan xabar!
Jahon futboli transferlarga ixtisoslashgan mashhur Transfermarkt portali Italiya chempionati A Seriyasida o‘ynayotgan 1995 yilda tug‘ilgan eng qimmat futbolchilar ramziy terma jamoasini tuzib chiqdi.
Ushbu terma jamoaning hujum chizig‘idan Eldor Shomurodov ham joy oldi. Hamyurtimiz o‘tgan yili Italiya chempionati vakili “Jenoa”ga ko‘chib o‘tganida mazkur portal uni 6,5 million evroga baholagandi. Biroq, ushbu saytda Genuya klubi o‘zbek hujumchisi transferi uchun Rossiyaning “Rostov” jamoasiga turli bonuslar bilan birga jami 9 million evro to‘lagani aks etgan.
Shomurodovning debyut mavsumida uning summasi 500 ming evroga ko‘tarilib, shu yilning yozida ham 7 million evroni tashkil qilgan edi.
Genuya klubida A Seriyada 31 ta uchrashuvda qatnashib, sakkizta gol urgan Eldorni yozgi transferlar davrida Joze Mourino bosh murabbiyligidagi “Roma” 17,5 million evro evaziga o‘z safiga qo‘shib oldi. Shunga qaramay, anchagacha portal bazasida Shomurodovning transfer summasi 7 million evroligicha qoldi.
Joriy yilning 14 oktyabr kuni Transfermarkt portali Italiya chempionatida to‘p tepayotgan futbolchilar reytingini yangiladi. A Seriyada faoliyat ko‘rsatayotgan futbolchilarning 121 nafarida narx ko‘tarilishi kuzatildi.
Eldor Shomurodovning transfer summasi ikki baravar oshib, 14 million evroga etgani sayt mutasaddilari tomonidan e’lon qilindi. Shu tariqa, “Roma”dagi futbolchimiz O‘zbekiston futboli tarixidagi eng qimmat o‘yinchiga aylandi.
Eldor Shomurodov joriy mavsumda A Seriyada o‘nta uchrashuvda maydonga tushib, raqiblar darvozasiga bitta gol urdi va jamoadoshlariga uchta golli pas oshirdi. Shuningdek, uning hisobida Konferentsiyalar ligasida “Trabzonspor” darvozasiga kiritilgan bitta to‘p va bir juft assist ham bor.
Yana bir e’tiborga molik jihat shundaki, Eldor 1995 yilda tug‘ilgan futbolchilar ramziy terma jamoaga kiritilgan o‘yinchilar orasida transfer summasi eng arzoni hisoblanadi.
Ushbu jamoa darvozasiga “Milan” sharafini himoya qilayotgan frantsiyalik posbon Mayk Menyan (25 million evro) tanlandi.
Himoya chizig‘idan italiyalik Alessio Romanoli (“Milan”, 20 million evro), niderlandiyalik Rik Karsdorp (“Roma”, 25 million evro) va slovakiyalik Milan Shkrinyar (“Inter”, 60 million) joy oldi.
Ushu ro‘yxatga kiritilgan eng qimmatbaho fubolchi “Latsio” yarim himoyachisi Sergey Milenkovich-Savich hisoblanadi. Uning transfer summasi bugungi kunda 70 million evroni tashkil qilmoqda. Serbiyalik futbolchi bilan birga maydon markaziga meksikalik Irving Losano (“Napoli”, 45 million evro), kamerunlik Andre Zambo-Angissa (“Napoli”, 25 million evro), frantsiyalik Adrien Rabo (“Yuventus”, 30 million evro), urugvaylik Naytan Nandes (“Kalyari”, 20 million evro) qo‘yildi.
Hujum chizig‘ida Eldor Shomurodovga sherik sifatida “Napoli”ning italiyalik forvardi Andrea Petanya kiritildi. Uning transferi 15 million evroga baholanmoqda.
Eldor Shomurodov ayni paytda O‘zbekiston milliy terma jamoasi o‘quv-mashg‘ulot yig‘inida ishtirok etmoqda. Srechko Katanets bosh murabbiylik qilayotgan jamoamiz 15 noyabr kuni safarda Gruziya terma jamoasi bilan xalqaro o‘rtoqlik uchrashuvi o‘tkazadi.
O‘zbekiston va Gruziya futbolchilari 2017 yili Birlashgan Arab Amirliklarida ham o‘rtoqlik o‘yinida kuch sinashgan. Mazkur bahsda 2:2 hisobida qayt etilgan va raqib darvozasiga har ikki golni Eldor Shomurodov urgan edi.
Fikrlar