Husanovning avtogoli qanday oqibatga olib kelgani aytildi

Angliya Premer-ligasining 29-turi doirasidagi uchrashuv O‘zbekiston milliy terma jamoasi markaziy himoyachisi Abduqodir Husanov uchun og‘ir keldi.

Bu turda “Manchester Siti” kelasi mavsum uchun Evropa Chempionlar ligasi yo‘llanmasini beradigan o‘rinlar uchun kurashdagi to‘g‘ridan to‘g‘ri raqibi – “Brayton” bilan o‘zaro kuch sinashdi.

O‘z muxlislari ko‘z o‘ngida o‘ynagan “shaharliklar” Erling Xoland va Umar Marmushning gollari evaziga hisobda ikki marta oldinga chiqib olgan bo‘lsa-da, bellashuv 2:2 hisobidagi durang bilan tugadi.

Ikkinchi bo‘lim boshidayoq Abduqodir Husanov raqib zarbasini qaytarishga harakat qilgan pallada to‘p uning oyog‘iga tegib, darvoza to‘riga borib tushdi. Avtogol mezbonlar g‘alabani qo‘ldan chiqarishiga sabab bo‘ldi.

Uchrashuvdan keyin “Manchester Siti” vakillari Husanovning avtogoliga munosabat bildirdi.

- Natijadan shaxsan mening hafsalam pir bo‘ldi. Biz ikki marta hisobda oldinga chiqib oldik va juda yaxshi o‘ynab turgandik. Bunaqa o‘yinda uch ochkoni qo‘lga kirita olmaslik biroz alam qiladi.

Biz ularni to‘pni nazorat qilishda cheklab qo‘ya oldik, deb o‘ylayman.

Ikkinchi bo‘lim boshida ikkinchi golni o‘tkazib yuborganimizdan keyin o‘zimizga bo‘lgan ishonchni yo‘qotib qo‘ydik. Mana shunaqa yuqori darajada ham xatolar bo‘lib turadi, - dedi “Manchester Siti”ning eng tajribali o‘yinchilaridan Ilkay Gyundog‘an.

“Shaharliklar” ustozi Xosep Gvardiola Abduqodir Husanovni qo‘llab-quvvatlashni ma’qul topdi. Ispaniyalik mutaxassis bu natijadan qat’i nazar chempionatdagi kurash oxirgi turgacha davom etishini ta’kidladi.

- To‘qqizta o‘yin, to‘qqizta final bo‘ladi. Kurash oxirgi kungacha davom etadigan ko‘rinadi. Bu uchrashuv “Nottigem Forest” bilan bo‘lgan o‘yinga o‘xshadi. Yaxshiyam yutqazib qo‘ymadik.

Oldinda bizni juda og‘ir o‘yinlar kutib turibdi. Chempionatdagi keyingi o‘yin o‘z maydonimizda “Lester”ga qarshi bo‘ladi. Keyin “Olt Trafford”ga boramiz. Ungacha Angliya kubogi doirasida “Bornmut” bilan muhim bahs bor.

Bu galgi o‘yinimiz “Nottingem Forest” bilan bo‘lgan bahsdan ancha yaxshi o‘tdi. Biz qulay vaziyatlar yarata oldik. Ikkita goldan tashqari, Savino to‘p kiritishi mumkin edi.

Jeremi Doku raqibga katta xavf tug‘dirdi, Umar Marmush har ikki golimizda ishtirok etdi. Ruben Diash va Abduqodir Husanov fantastik darajada yaxshi o‘ynashdi. Umuman olganda, hammasi yaxshi kechdi.

Ikkinchi bo‘lim boshida 2:1 hisobida oldinda edik, biroq burchakda ehtiyotsizlikka yo‘l qo‘ydik va buning oqibatida ular hisobni tenglashtirdi. Bizga barqarorlik etishmadi, lekin bu tabiiy hol. Keyin o‘yinga qaytib, yana yaxshi vaziyatlarga ega bo‘ldik. Oxirigacha kurashish mas’uliyatini bo‘ynimizga olamiz, - dedi Xosep Gvardiola “Manchester Siti” saytiga bergan intervyusida.

“Manchester Siti” navbatdagi uchrashuvini 30 mart kuni Angliya kubogi doirasida “Bornmut” jamoasiga qarshi o‘tkazadi. Ungacha jamoaning bir necha o‘yinchilari qatori Abduqodir Husanov FIFA kunlari munosabati bilan xalqaro uchrashuvlarda qatnashib keladi.

O‘zbekiston milliy terma jamoasi mart oyida 2026 yilgi jahon chempionatining mintaqaviy saralash turniri uchinchi bosqichida Qirg‘iziston va Eronga qarshi ikkita muhim bellashuvda maydonga tushadi.

Italiya afsonalari Shomurodovni nega “podderjka” qilyapti?

Gvardiola Husanov avtogol urgan uchrashuvdan keyin nima dedi?

Bir uchrashuvda Xoland rekord, Husanov antirekord o‘rnatdi!

Premer-liga antirekordchisi Husanovga qanday baho berdi?

Raneri Shomurodov masalasida katta xatoga yo‘l qo‘ydi!

“Manchester Siti”: Hozir Husanovga tegib bo‘lmaydi!

Husanovga yaxshi yangiliklar...

“Roma”ni qutqara olmagan Shomurodovning o‘yini qanday baholandi?

Eldorning rafiqasi kim? Evropada Shomurodovning oilasiga qiziqa boshlashdi!

Fayzullaev: Ortga qaytyapman!