Tezkor xabar (Boks). Riodagi zafarlar Rigada ham davom etmoqda

11 dekabr, 2016, 09:51
0
Boks

Xabaringiz bor shu kunlarda Latviya poytaxti Riga shahrida boks bo‘yicha “Riga Open 2016” xalqaro turnir bo‘lib o‘tmoqda.

67-marotaba o‘tkazilayotgan bu turnirda O‘zbekiston nomidan besh nafar bokschi munosib tarzda ishtirok etmoqda.

Kecha 10 dekabr kuni o‘tkazilgan yarim final janglarida ringga ko‘tarilgan terma jamoamizning 5 nafar a’zosi barcha janglarda g‘alaba qozonib final yo‘llanmasini qo‘lga kiritishdi.

Dastlab 54 kg vazn toifasida Sirojiddin G‘ulomjonov mezbon sportchi Oskars Rankansni mag‘lubiyatga uchratgan bo‘lsa, Abdulhay Sharahmatov (56kg) yana bir mezbon jamoa a’zosi Sergey Hodyunisga hech qanday imkoniyat qoldirmadi.

Shuningdek Elnur Abduraimov(64kg) hamda Mahmud Gaipov(75kg) ham mos ravishda final yo‘llanmasini naqd qilib qo‘yishdi.

Yarim finallarning eng qiziqarli janglari +91 kg vazn toifasida bo‘lib o‘tdi. Unda hamyurtimiz Bahodir Jalolov norvegiyalik Simen Nisaeterga qarshi ringga ko‘tarildi. Jalolov ustunligida o‘tgan bu bahs ham terma jamoamiz a’zosining foydasiga hal bo‘ldi.