Xavi Garsiya: "Krishtianu Ronalduni — mehnatsevarlikning eng yorqin namunasi"

"Real Madrid", "Benfika", "Manchester Siti" va "Zenit" sobiq yarim himoyachisi Xavi Garsiya Krishtianu Ronaldu haqida fikr bildirdi.

— Siz Krishtianu haqida gapirdingiz. 41 yoshida u o‘z oldiga 1000 ta gol urish maqsadini qo‘ygan. Va u buni amalga oshiradi...

— Men uning mentalitetiga chin dildan havas qilaman. Faoliyatini yakunlash haqidagi fikr hatto hayoliga ham kelmaydi. Men uning bir kuni Portugaliya terma jamoasi bilan jahon chempionatida g‘alaba qozonishini istardim. U bunga munosib. U butun hayotini shu kasbga bag‘ishladi. Men juda xohlardimki, u bu orzusiga yetsin. U bunga haqli. Undan-da professionalroq insonni tasavvur qilish qiyin.

— Uning jozibasi nimada deb o‘ylaysiz?

— Albatta, tushunaman. Bir misol keltirsam. Mening ikki qizim bor. Kattasi kam o‘qisa-da, juda yaxshi baholar oladi. Kichik qizim esa ko‘p o‘qiydi, juda intizomli, ammo baholari unchalik yuqori emas. Bir kuni u xafa holda hech narsani tushunmayotganini aytdi.

Men unga Krishtianu va Lionel Messi misolida tushuntirdim. Albatta, argentinalikda tabiiy iste’dod ko‘proq. Ammo Krishtianuda ham iste’dod bor va u noyob mehnatsevarlikka ega. Krishtianu butun faoliyati davomida tinmay mehnat qildi va bugungi darajaga shu orqali yetdi.

Men qizimga aytdim: hayotda qattiq mehnat va sa’y-harakat bilan istalgan natijaga erishish mumkin. Faqat iste’dodning o‘zi yetarli emas. Agar sen Krishtianu kabi mehnat falsafasini qo‘llamasang, muvaffaqiyatga erishish qiyin. Men unga chin dildan qoyil qolaman, — dedi Garsiya.