Yamal bir zarba bilan rekord o‘rnatdi

“Barselona” qanot hujumchisi Lamin Yamal evrokuboklarda klub tarixidagi eng kech urilgan penalti muallifiga aylandi.

Bu haqida Opta analitik portali xabar berdi.

Evropa Chempionlar ligasi 1/8 final bosqichidagi birinchi uchrashuvda “Barselona” safar uchrashuvida “Nyukasl Yunayted” bilan 1:1 hisobida durang o‘ynadi.

Bahsning 86-daqiqasida Xarvi Barns hisobni ochgan bo‘lsa, o‘yin yakunlanishi arafasida Lamin Yamal penaltidan hisobni tenglashtirdi.

18 yoshli ispan futbolchisi 11 metrlik nuqtadan gol urgan paytda tabloda 95:50 vaqti qayd etilgandi.

Bu “Barselona”ning Chempionlar ligasidagi butun tarixi davomida penaltidan urilgan eng kech gol hisoblanadi.

Kataloniya klubi va “Nyukasl” o‘rtasidagi javob o‘yini 18 mart kuni bo‘lib o‘tadi.