"Yaratgan bizni taqdirlayapti, ammo hali mavsum tugagani yo‘q" - "So‘g‘diyona"ning legioneri muvaffaqiyatli start haqida

“So‘g‘diyona” klubi uchun joriy mavsum muvaffaqiyatli o‘tayotganini barcha ko‘rib turibdi. Faqatgina “Paxtakor” bilan jizzaxliklar mag‘lubiyatsiz seriyani davom ettirishyapti. “So‘g‘diyona” safarda “Qo‘qon-1912” ustidan muhim g‘alabani qo‘lga kiritdi. Jamoada bir necha yillardan beri faoliyat ko‘rsatayotgan serbiyalik darvozabon Milan Mitrovich doimgidek “So‘g‘diyona”ning g‘alabalariga o‘z hissasini qo‘shib kelyapti. Qo‘qonliklarga qarshi bellashuvdan keyin Mitrovich sports.uz uchun o‘z fikrlarini bildirdi.

Qo‘qondagi g‘alaba haqida

- O‘yin biz uchun juda yaxshi o‘tdi. Ammo, baxtga qarshi biz dastlabki daqiqadayoq gol o‘tkazib yubordik. Shunday bo‘lsa ham, jamoamiz o‘yinni baribir o‘z foydasiga hal etdi. Bu juda yaxshi natijadir. Buning asosiy sababchilari yigitlarimizdir. Ular o‘yin chog‘ida 100 emas, balki 120 foiz kuch bilan to‘p surdi. Ular maydonda borlarini berib o‘ynashga odatlangan. Shu boisdan ham, taqdir bizni taqdirlab, buning evaziga qandaydir 10 daqiqa ichida raqib darvozasiga ketma-ket uchta gol urdik. Bundan tashqari, bizda birinchi bo‘limda ham qo‘qonliklar darvozasini ishg‘ol etish uchun yana qator qulay vaziyatlar yuzaga keldi.

Buni qarangki, imkoniyatlardan samarali foydalana olmaganimiz bois futboldagi o‘lmas qoida – seng urmasang, senga urishadi, ishga tushib darvozamizdan yana bitta gol o‘tkazib yubordik. Bizda 1:3 bor edi, shuning evaziga raqib ham asta-sekinlik bilan taqdirga tan bera boshlashga tushgandi. Biz bundan foydalanib qolishga harakat qildik va o‘yinni mantiqiy yakuniga etkazish payida bo‘ldik. Biz o‘yinni ochiq ko‘rinishda bo‘lishiga yo‘l qo‘yganimiz sababli ikkita gol o‘tkazib yubordik. Dastlabki bo‘lim telbavor ruhda o‘tgani bois tanaffusdan so‘ng, maydonda avvalgidek shiddat unchalik ko‘zga tashlanmadi. Tanaffus chog‘ida hisobdagi ustunlikni saqlab qolish haqida ko‘rsatmalar oldik. Maydonga qaytganimizdan so‘ng, bu ko‘rsatmani amalda bajarishga erishdik ham. Yana takrorlayman: yigitlar uchrashuv paytida 120 foiz kuchlarini ishga solayotganlari uchun ham Yaratgan bizni taqdirlayapti.

Mag‘lubiyatsiz seriya

- Bir qancha vaqt oldin ham bergan intervyularimdan birida jamoamizdagi yigitlarning mashg‘ulot chog‘ida juda tirishqoqlik bilan mashq qilayotganlarini alohida ta’kidlab o‘tgandim. Yigitlarimiz maydonga tushganlaridan keyin maksimum darajada to‘p surayotganlari uchun ham jamoamiz ayni paytda musobaqa jadvalining yuqori pog‘onasini egallab turibdi. Nafaqat biz o‘yinchilar, balki klubdagi boshqa insonlar ham hozirgi holatga ijobiy ta’sir ko‘rsatib kelayotganlarini alohida e’tirof qilishim joiz. Xudo xohlasa, bundan keyin ham boshlagan ishimizni shu tarzda davom ettiramiz, degan umid yo‘q emas.

Muxlislar ishonchi

- Rostini aytsam, biz – Jizzaxdagi barcha odamlar mana shunday bo‘lishini juda istayotgan bo‘lsalar ajab emas. Ammo shuni ham unutmaslik kerakki, mavsumning birinchi yarmi hali nihoyasiga etgani yo‘q. Oldinda ko‘plab o‘yinlar kutib turibdi. Biz maqsad sari qadamba-qadam intilyapmiz. Umid qilamizki, yakunda ko‘zlagan maqsadimizga erisha olamiz. Bizni qo‘llab turgan ishqibozlarimizning ishonchini qozonish uchun kurashyapmiz.

Jamoaning asosiy maqsadi

- Mavsum avvalida o‘z oldimizga qo‘ygan maqsad mana shunday edi: chempionatni kuchli uchlikda yakunlash! O‘z navbatida, ushbu maqsadni amalga oshirish yo‘lida bundan keyin ham astoydil harakat qilishga bel bog‘ladik. Ahamiyatlisi, jamoamiz yildan-yilga o‘tib borayotgani sayin tobora yaxshi o‘yin ko‘rsatyapti. Agar e’tibor berayotgan bo‘lsangiz, jamoadagi asosiy futbolchilar birgalikda ikki yildan beri to‘p surib kelishmoqda. O‘tgan vaqt mobaynida safimizga bor-yo‘g‘i ikki-uch nafar yangi o‘yinchi kelib qo‘shildi xolos. O‘sha ijrochilar jamoani va boshlang‘ich tarkibdan o‘rin egallash uchun kechadigan kurashni kuchaytirish maqsadidagina tarkibga jalb etilgan. O‘z o‘rnida hamma klubdagi vazifasini imkon qadar yaxshi bajarish payida bo‘layotgani uchun ham natijalarimiz ijobiy ko‘rinish olmoqda. Murabbiylar jamoani o‘yinlarga yaxshi tayyorlab borishmoqda. O‘z navbatida biz futbolchilar maydonda bir-birimizni yaxshiroq qo‘llab-quvvatlashga harakat qilyapmiz. Buni hamma ko‘rib turibdi, deb hisoblayman. Biz bir oilamiz.

Ulug‘bek Baqoev xususida

- Juda zo‘r. Baqoev shunday murabbiyki, u qo‘l ostidagi futbolchilarni har bir uchrashuvda g‘alaba qozonish uchun tayyorlaydi. U raqiblarni hurmat qiladi, ammo birortasidan qo‘rqmaydi. E’tiborlisi shundaki, Baqoev qo‘l ostidagi shogirdlarini zo‘r berib himoya qiladi, kerak bo‘lsa, bunday mahalda u juda qiziqqon bo‘lib ketadi va tortishishga tushadi. Shuningdek, Baqoev o‘zidagi quvvatni biz futbolchilarga berishni ham uddalaydi.