"Ўзбек футболи УЕФАга ўтиши керак. Осиёда юраверса, бундай тизим билан жаҳон чемпионатига чиқа олмайди" - "Локомотив" устозидан жиддий гаплар

“Локомотив” клуби бугун сафарда “Қўқон-1912”га 2:1 ҳисобида мағлубиятга учради. Ўйиндан кейин ташкил этилган матбуот анжуманида меҳмонлар устози Микаэль Секейра қатнашди ва кескин гапирди.

- Бугун жуда қийин ва тажовузкор ўйин бўлди. Дастлабки 20 дақиқада Қўқон жамоаси жуда агрессив ўйнади ва сариқ карточкаларга “сазовор” бўлганди. Ҳакамлар эса уларни шундай ўйин кўрсатишига қўйиб беришди. Биринчи голни такроран кўрганимизда Бамба қўли билан уриб кетди. Иккинчи бўлимда “Локомотив” ўйин услубини бироз ўзгартирди. Натижада биринчи бўлимга нисбатан анча яхши ўйин кўрсатдик. 1:1 бўлиб турган маҳалда қарши ҳужумда Диёр Туропов яхши имкониятга чиқаётганида кўпчилик кўрган ҳолда айтяптики, уни формасидан тортиб қолишди. Аммо ҳакам эътибор қилмади.

- “Локомотив”ни “Сўғдиёна”, “Пахтакор” ва “Насаф”га қарши ўйинлари қолди. Бунга қандай қарайсиз, очко олишинглар мумкинми?

- Аввало, ҳаракат қиламиз. Аммо бугун ютқазмаслигимиз керак эди. Ечиниш хонасида футболчиларимиз хафа. Бугунги ўйинни бошқарган ҳакам бизнинг учта ўйинимизни бошқарган бўлса, учаласида ҳам мағлубиятга олиб келган. Ёдингизда бўлса, “Бунёдкор” билан ўйнаганимизда ҳам охирги дақиқада тўп учун ўйналган вазиятда пенальти белгилаганди. Ўшанда рақиб 3:2 ҳисобида ғалаба қозониб кетган. Бугунги ҳакамликдан ўзим ҳам хафа бўлиб кетдим. Португалиядан келиб ҳаётим давомида бунақа ҳакамликни кўрмаганман. Ўз фикримни айтаман: Ўзбекистон футболини кўтарилишига битта йўл бор! Тўғри, академиялар бор, очиляпти, аммо бу нарса масалани ҳал қилиб бермайди. Ўзбек футболи УЕФАга аъзо бўлсагина кўтарилади. Ўзбекистон Осиёда юраверса, бунақа тизим билан ҳеч қачон жаҳон чемпионатига чиқа олмайди. Ўзбекистон УЕФАга аъзо бўлса, ҳамма нарсага эришади.  Ана шунда чемпионат кўтарилади, футболчиларни бир-бирига меҳри бошқача бўлади, майдонда бир-бирини уриб синдиришмайди. Бу ердан кун келиб кетадиган бўлсам ҳам жуда хафа бўлиб кетаман. Насиб бўлса, чемпионат тугаганидан кейин бир ойдан сўнг уйимга жўнайман. Ўзбекистонда яхши иқтидорли футболчилар бор. Лекин яхши ҳакамлар, академиялар кўпаймаса, УЕФАда бўлмаса Ўзбекистонда ҳеч қанақа имконият бўлмайди ва ҳеч қачон жаҳон чиқа олмайди. Мен Ўзбекистонга омад тилайман. Бу ерда яхши одамлар кўп. Аммо бундай тизим билан имконият бўлмайди, пастга қараб чўкиб кетаверади.