Азизбек Абдуғофуров чемпионлик камарини 91 жангда ғалаба қозонган нокаутчидан ҳимоя қилади
Профессионал боксдаги фаолиятини ўтган йили бошлаб, кетма-кет нокаутлар билан мухлису мутахассислар эътиборига тушган боксчимиз Азизбек Абдуғофуров (4-0-0, 4 КО) WBC йўналиши бўйича Asian Boxing Council middleweight title - Осиё чемпионлик камарини қўлга киритган эди.
Ҳаваскорлар боксида катта тажриба тўплаган Азизбек профессионал боксда ўзига хос стратегия танлади ва бунинг самарасида жуда тез танилди. Одатда, профессионал рингга қадам қўйган боксчилар дастлабки йилларда кўнима ҳосил қилиш учун ўзларига ўхшаган "янги профессионаллар" ёки мағлубиятга кўникиб қолиб, дебютантларнинг руҳини кўтаришга хизмат қиладиган рақиблар билан жанг қилади.
Азизбек эса фаолиятини профессионал бокс ҳавосини олган тажрибали боксчиларга қарши жанглар билан бошлади. Ўтган йили дастлабки икки жангда Гига Надирадзе (20-10-1) ва Сахлан Корал (15-4-0) устидан қозонилган ғалабадан сўнг Азизбек Абдуғофуров енгилмас боксчи Чалоемпорн Саматсук (17-0-0) билан WBC Asian Boxing Council middleweight title - Осиё чемпионлик карами учун рингга чиқди.
Икки енгилмас боксчининг бу жангида ўзбек боксчиси биринчи раунддаёқ рақибини нокаутга учратиб, қитъа чемпионлигига сазовор бўлди.
Азизбек Абдуғофуров жорий йилнинг 7 январ куни профбоксда 41 та ғалабага эга бўлган индонезиялик Александер Баявага қарши рингга кўтарилди. Саккиз раундга мўлжалланган жангнинг иккинчи раундида Азизбек кучли зарба билан рақибини нокаутга туширди.
Энди Азизбек Абдуғофуров 10 февраль куни WBC йўналиши бўйича Осиё чемпионлиги камарини илк бор ҳимоя қилади. Сингапурда бўладиган чемпионлик жангида ҳамюртимизга қарши Сиримонгкол Эамтуам рингга чиқади. Таиландлик боксчи профессионал рингда 93 та жанг ўтказиб, 91 марта зафар қучган, шулардан 57 тасида рақибларини муддатидан олдин енгган.
Сиримонгкол Эамтуам бир неча марта турли вазнларда жаҳон чемпионлигига сазовор бўлган ўта кучли профессионал боксчи ҳисобланади. Тажрибали чарм қўлқоп устаси қарийб 15 йилдан буён мағлубият нималигини билмай келмоқда.
Азизбек Абдуғофуров бўлажак жангга Андижон ва Тошкент шаҳрида тайёргарлик кўрди. Ҳамюртимиз тез кунларда тайёргарликни сўнгги босқичини ўташ учун Малайзияга йўл олади.
Бўлажак жангда Азизбек Абдуғофуровга ғалаба тилаймиз!
Фикрлар