Беҳруз Амондавлатов икки карра жаҳон чемпиони билан курашади
Ads

Прага шаҳри дзюдо бўйича эркаклар ўртасидаги Европа очиқ чемпионатига мезбонлик қилмоқда. Айни дамга келиб, бир қатор вазн тоифаларида саралаш беллашувлари бўлиб ўтди. 

-66 килограмм вазн тоифасида баҳс олиб борган Беҳруз Амондавлатов ажойиб натижа қайд этмоқда. Беҳруз дастлаб мезбон спортчини мусобақадан чиқариб юборгач, иккинчи даврада Нанкинда ўтказилган ўсмирлар Олимпиадаси кумуш медаль соҳиби украиналик Богдан Ядов билан курашди. Муросасиз кечган баҳс "Golden score"гача давом этиб, унда юртдошимизнинг қўли баланд келди. Энди уни чорак финал остонасида янада жиддий рақиб кутиб турибди. Беҳруз кейинги босқичга чиқиш учун икки карра жаҳон чемпиони ва Рио Олимпиадасининг бронза медали соҳиби япониялик Наохиса Такатони енгиши талаб этилади. 

-60 килограмм вазн тоифасида курашаётган Достон Рўзиев ҳам билдирилган ишончни оқлашда давом этмоқда. Биринчи даврадаёқ ўта жиддий рақиб, франциялик Софян Милоус доғда қолдирилди. Унинг кейинги рақиби испаниялик Ёкин Сагарзазу бўлади. 

-73 кг. вазн тоифасида баҳс олиб борган Ҳусниддин Каримов, шунингдек, Варшавада айни шу статасда аёллар мусобақасида иштирок этган Ҳожинисо Камолиддинова (-63 кг) ҳамда Санобар Султонова мусобақани тарк этишди.