Чемпионлар Лигаси қуръаси. Кимга маза-кимга...

Куни кеча Чемпионлар Лигасининг 2018-19-йилги мавсуми учун қуръа ташлаш маросими бўлиб ўтди. Унда бир қатор гранд жамоалар ўзларига мос рақиб билан тушган бўлса, баъзилари қуръа унчалик хуш ёқмагани аниқ. Қуйида кўҳна қитъанинг янги мавсуми омадли ва омадсизлари ҳақида сўз юритамиз.

Омадли: «Реал Мадрид»

Ушбу мавсум «Реал» ва Хулен Лопетеги учун ўзгача кечиши аниқ. Клубни ёзда икки муҳим бўлак – Зидан ва Роналду тарк этганидан кейин «қироллик клуби»нинг натижаларини кузатиш анча мароқли бўлади.

Таркиб кучайтирилгани йўқ, шу сабабли «Реал» тўртинчи совринини ютиши бироз қийин бўлади. Боз устига улар Чемпионлар Лигасининг янги мавсумида «ўлим гуруҳи»га тушди.

Ўтган мавсумда улар нимчорак финалгача анча қийинчилик кўришди. «Тоттенхем» ва «Боруссия Дортмунд» мадридликларга жиддий рақиблик қилган эди. Бу сафар эса «Рома»дан ташқари жиддий рақиб йўқ. Римликлар ҳам у қадар тажовуз сола олмайди.

Россия етакчи клубларидан бири «ЦСКА» эса Чемпионлар Лигаси савиясидаги жамоа эмас. Нуфузли мусобақанинг гуруҳ босқичида ўйнаш тажрибасига эга «Виктория Пльзен» тўсиғидан ҳам осонликча ўтса бўлади.

Европананинг бош турнири Лопетеги учун кучли босим остида бошланиши муқаррар, Гарет Бейл ва Мариано Диаслар эса Роналдунинг голларини тўлдиришга уриниб кўришади.

Омадли: Криштиану Роналду

Роналду «Йилнинг энг яхши футболчиси» совринини бу сафар қўлга кирита олмаган бўлсада, «Ювентус» сафида Чемпионлар Лигасидаги 120 голлик сериясини давом эттириши турган гап.

Роналдуни индивидуал совринчалик бошқа ҳеч бир нарса уни рухлантира олмайди. Скудетто эгалари сафида ҳам у янгидан-янги совринларни олишни исташи аниқ.

Шу сабабли «Валенсия» Роналду учун ажойиб «тушлик» бўлиши мумкин. «Янг Бойс» эса ўз тарихида биринчи бор Чемпионлар Лигаси гуруҳ босқичида иштирок этади.

Ва ниҳоят учинчи рақиб эса бир вақтлар ўзи шу клубда ном чиқаргани ва ушбу совринни биринчи марта ютгани – «Манчестер Юнайтед». У «Реал»даги собиқ устози Жозе Моуриньога қарши саф тортади.

Омадли: «Манчестер Сити»

Премьер Лиганинг амалдаги чемпионлари мана икки йилдирки, Пеп Гвардиола даврида яшамоқда ва энди Европанинг бош соврини ҳақида ўйлай бошласа бўлаверади.

Уларнинг таркиби етарлича кучли ва тажрибали. Чемпионлар Лигасидаги бирорта жамоа бундай кенг таркибга эга эмас. Таркиб шу даражадаки, жароҳат олиб сафдан чиққан Де Брюйненинг йўқлиги ҳам билинмайди.

«Шахтёр» билан ўтган мавсумда ҳам гуруҳ босқичида тўқнаш келган, шу сабабли иккала томон бир-бирини жуда яхши билади. Донецкликлар бош мураббийи Фонсекани сақлаб қолган бўлсада, ўз етакчиси Фредни жамоадан олиб қолишнинг уддасидан чиқолмади.

«Лион» эса француз футболи келажаги дея кўрилаётган – Тусар, Ауар ва Ндомбелелар билан курашиб кўради.

«Хоффенхайм» ўтган мавсумда Бундеслиганинг учинчи ўринини эгаллаган эди. Демак, у ҳам «шаҳарликлар»га жиддий рақиб ҳисобланмайди.

Омадсиз: «Ливерпуль»

«Очиғини айтсам, мен кутган гуруҳга тушмадик. Мен қийин гуруҳни кутгандим ва шундай бўлди. Бу Чемпионлар Лигаси.» – деди «қизиллар» бош мураббийи Юрген Клопп қуръа ҳақида ўз фикрларини билдираркан.

Мерсисайдликлар бу сафар нуфузли мусобақага Чемпионлар Лигаси финалчиси мақомида «жанг»га кираркан, улар гуруҳда «ПСЖ»дан кейин иккинчи фаворит сифатида тилга олинмоқда.

«Наполи» янги бош мураббийи Карло Анчелотти билан «Сан Паоло»да қаҳрамонлик кўрсатишга уриниб кўради.

Фақатгина «Црвена Звезда» эса ҳойнаҳой очко улашувчи жамоа бўлса керак.

Омадсиз: Жозе Моуриньо

Моуриньонинг «Манчестер Юнайтед»и ўтган сафар «Севилья»га қарши плей-офф босқичида кўрсатган ўйини кўп нарсадан дарак беради.

«Валенсия» Ла Лигада тўртинчи ўринни эгаллади. Ички чемпионатни бир текисда бошлай олмаган Марселино шогирдлари бор эътиборини Чемпионлар Лигасига қаратиши аниқ.

Моуриньонинг «кўршапалаклар»га қарши ўйинларда эришган натижаси «қизил иблислар» учун аҳамиятли бўлади. Агарда «Лос Че»ни юта олмаса «ўзгача» гуруҳ пешқадамлигидан умидини узса ҳам бўлаверади.

Чунки ишлар бундай кечмаса, Роналдунинг «Ювентус»идан ўзиб кета олмайди. Италияликлар «Реал»дан ушбу совринни ютиш бўйича мутахассисни олиб келиб олдиларига жиддий мақсад қўйишган.

«Қизил иблислар» шунингдек мусобақа дебютанти «Янг Бойс»га қарши ўйинларда ҳам ўзини кўрсатиши керак.

Омадсиз: «ПСВ Эйндховен»

Голландиянинг гранд жамоалари сафига қайтган ва плей-офф учрашувлари орқали Чемпионлар Лигаси гуруҳ босқичигача етиб келган «ПСВ»га қуръа кулиб боқмади.

Лозано ва унинг шериклар гуруҳ босқичидан чиқиш учун ўз йўлида оғир захмат чекишади. Уларнинг йўлида кимсан «Барселона» ва Лионель Месси турибди. Бу ҳам камлик қилгандек «Тоттенхем» бор.

Учинчи ўрин учун улар «Интер» билан куч синашиши кутилмоқда.