"Локомотив"нинг ОЧЛ-2019даги рақиби "Ал Ваҳда" ҳақида маълумотлар

"Локомотив" ОЧЛнинг 2019 йилги мавсумида B гуруҳида кураш олиб боради. Клуб матбуот хизмати гуруҳдаги БААнинг "Ал Ваҳда" жамоаси ҳақида маълумотларни тақдим этди.

"Ал Ваҳда" - БАА Про-лигасининг 4 карра чемпиони. Жамоа 2 марта Президент кубоги, 4 бора мамлакат Суперкубоги ва 2 марта БАА лига кубоги совринини қўлга киритган.

Жамоани айни дамда голландиялик мутахассис Хенк Тен Кате бошқармоқда. Бунгача у "Ал Жазира"да ишлаганини барча билса керак.

Абу-Даби шаҳри шарафини ҳимоя қилувчи жамоа ўтган мавсум БАА Про-лигасининг 2-поғонасини қўлга киритди ва ОЧЛ йўлланмасига эга чиқди. Турнир жадвалида "Ал Ваҳда" 22 ўйиндан кейин 46 очко тўплади. Жамоа 14 марта ғалабага эришган бўлса, 4 мартадан дуранг ва мағлубият қайд этди.

Ушбу мавсумда эса клуб айни дамда миллий чемпионатнинг 5-поғонасида кетмоқда. "Ал Ваҳда" 12 ўйинда 5 ғалаба, 3 дуранг ва 4 мағлубият қайд этди.

"Ал Ваҳда" сўнгги 2 ўйинида мағлуб бўлди. Отабек Шукуров гол урган куни "Шаржа"га 2:3, шунингдек, Президент кубогида "Дибба Ал Фужайра" жамоасига 0:6 ҳисобида ютқазиб қўйди.

"Ал Ваҳда" таркибида жанубий кореялик Рим Чанг-Ву, мисрлик Абдалла Ал Рафаей, бразилиялик Леонардо, марокашлик Мурод Батна, аргентиналик Себастьян Таглябюэ, танзаниялик Яхё Ал-Ҳассаний каби легионерлар фаолият олиб боришмоқда.

Себастьян Таглябюэ 11 гол билан жамоанинг тўпурари бўлиб турибди.

ОЧЛнинг якунланган мавсумида "Локомотив" ўз гуруҳида "Ал Ваҳда"га қарши баҳс олиб борганди. Ўшанда жамоамиз икки ўйинда 5:0 ва 4:1 ҳисобида ғалабага эришганди.