Милош Трифунович: «Бунёдкор»даги фаолиятимни эслаш доим ёқимли

Ёзги трансферлар вақтида Суперлига клублари ўз таркибларини кучайтириш учун янги футболчилар билан шартномаларни имзоладилар. Қолаверса, қурби етган жамоаларимиз легионер ўйинчиларни ҳам олиб келдилар. Айниқса, трансферлар ойнаси очилган пайтда ОКМКга тажрибали ҳужумчи Милош Трифуновичнинг жалб этилгани эътиборга молик харидлардан бири бўлди. Мухлисларимиз жуда яхши таниш бўлган сербиялик ҳужумчи 2011 йили Тошкентнинг “Бунёдкор” клубида тўп суриб ўзининг сермаҳсул ўйинлари билан ёдимизда сақланиб қолганди. Ўшанда у 25 та учрашувда рақиблар дарвозасига 17 та гол уриб тўпурарга айланганди. Шундан кейин Трифуновичнинг ўйнаган клублари: “Ляонинг Хунёнг” (Хитой), “Атирау” (Қозоғистон), “Раднички” (Сербия), “Ньюкасл Юнайтед Жетс” (Австралия),”Ордабаси” (Қозоғистон), “Войводина” (Сербия), “Радник” (Сербия) ва “Младост” (Сербия). ОКМК эса унинг фаолиятида навбатдаги жамоага айланди. Биз эса иккинчи бор юртимизга қайтган ҳужумчи билан суҳбатлашдик.

- ОКМКда пайдо бўлишингиз кўпчиликни ҳайрон қолдирди. Бу қандай юз берди?

- Игорь Петкович, Олмалиқнинг собиқ ўйинчиси менга қўнғироқ қилди ва ОКМКда ўйнашни истайсанми деб сўради. Биз дарҳол барча масалалар борасида бир тўхтамга келдик. Шунинг учун ҳам жамоа таклифини қабул қилдим.

- Ўз вақтида “Бунёдкор” сафида қандай тўп сурганингизни жуда яхши эслаймиз. Собиқ клубингиздан қандай хотиралар қолган?

- “Бунёдкор”даги фаолиятимни эсга олиш доим ёқимли. Гарчи клуб сафида бор йўғи бир йил тўп сурган бўлсам-да, мураббий ва барча ўйинчилар билан жуда ажойиб алоқа ўрнатишга улгургандим. Фурсатдан фойдаланган ҳолда уларга омад тилаб қолмоқчиман.

- Айтинг-чи, яна Ўзбекистон чемпионатида тўп суришингиз мумкинлигини кутганмидингиз?

- Киши ҳаётда ўзини нима кутиб турганини билмайди. “Бунёдкор”дан кетганимдан кейин бир кун яна Ўзбекистонга қайтишим мумкинлиги умуман хаёлимга келмаганди. Шундай экан, яна бу ерда эканлигимдан хурсандман.

- “Бунёдкор”да ўйнаб юрган кезларингизда 25 та учрашувда 17 бор гол киритгансиз. Аммо кейинчалик сизни бу даражада самарали ўйнаганингизни кўрмадик. Сабаби нимада?

- Бизда жуда яхши жамоа шаклланганди. Одатда бундай шароитда статистик кўрсаткичлар ҳам кишини хурсанд қиладиган даражада бўлади. Умид қиламанки, ОКМКда ҳам ўзимни кўрсатаман.

- Бугунги “Бунёдкор” ҳақида нима дея оласиз? Клубнинг кечаги ва бугунги ҳолатини таққослаб берсангиз?

- Кўп нарса ўзгариб кетган. Клубни тарк этганимдан бери бугунги “Бунёдкор” кечасига умуман ўхшамайди. Айтишим керакки, ҳозирги жамоада истиқболи порлоқ ўйинчилар кўп. Жумладан Жавлон Иброҳимов ва Анвар Ғофуров ҳам бор. Шунингдек, Филип Райевацни аъло даражадаги футболчи деб ҳисоблайман.

- Ҳозирча ОКМКда гол киритганингиз йўқ. Нима, чемпионатимизда рақиблар дарвозасини ишғол этиш қийинлашиб кетганми?

- Асосийси, жамоавий натижа. Клуб яхши ўйнар экан, натижалар ўзини куттириб қўймайди. Ўз навбатида мақсадлар ҳам шунга боғлиқ бўлади.

- ОКМКнинг жорий мавсумдаги имкониятларини қандай баҳолайсиз?

- Аввало ғалабалар қозонишни бошлашимиз керак эди, қўлга киритилган кетма-кет икки ғалабадан сўнг ўйинчиларимизда дастлабки олти жамоани қувиш учун яхши имконият юзага келяпти.

- Умуман олганда, ОКМК клуби бош мураббийи Бахтиёр Ашурматов билан қачондан бери танишсиз?

- Уни илгари кўрмаганман. Лекин Ашурматовнинг олдин “Бунёдкор”да яхши ўйин намойиш этганидан хабарим бор эди.

- Энди чемпионатимиз формати ўзгарди. Сизнинг фикрингиз қандай: ривожланиш кўзга ташланяптими ёки ҳаммаси аввалгидекми?

- Ўйлайманки, ўзгариш сезиларли даражада юзага келган. Ҳар бир жамоа сафида аъло даражадаги футболчиларнинг борлиги гапимнинг тасдиғидир.

- Бунгача юртимизда кимлар билан яқин дўстлашгандингиз?

- Ҳа, дўстларим бор. Улар Жасур Ҳасанов, Камол Мурзоев ва Лутфулла Тўраевдир. Уларни илгари “Бунёдкор”да ўйнаганимдан бери биламан.

- Ўйинчи сифатидаги келажак режаларингиз билан ўртоқлашсангиз?

- Яна 3-4 йил давомида юқори савияда тўп суришни режалаштириб қўйганман.

- Футболдан ташқари спортнинг яна қандай турларини ёқтирасиз?

- Футболдан ташқари баскетбол ва теннисни ёқтираман.

- Табиийки, жаҳон чемпионати чоғида Сербияга мухлислик қилдингиз. Ундан ташқари яна қайси терманинг ўйини сизда яхшироқ таассурот қолдирди?

- Саволингизнинг иккинчи қисмига келсак, Аргентина терма жамоаси иштирокдаги ўйинларни катта қизиқиш билан кузатдим.

- Ҳар бир кишининг севимли машғулотлари бўлади. Хоббингиз қандай?

- Ўғилларим билан бирга ўйнашни жуда ёқтираман.

- Бутсаларингизни михга илганингиздан сўнг мураббий сифатида ишлайсизми?

- Ҳозирча бу борада якуний тўхтамга келганим йўқ.

- Айни пайтда оилангиз сиз билан яшаяптими?

- Ҳа, улар мен билан бирга. Ўғлим мактабга қатнаяпти.

- Чемпионатимизда тўп сураётган бошқа легионерлар билан алоқангиз борми?

- Албатта, алоқам бор. Биз ҳар куни гаплашиб турамиз. Чемпионатингиздаги легионерларнинг кўпи билан яхши танишман.

- Сиз учун қайси ҳужумчи идеал саналади?

- Мен учун Леонель Месси жаҳондаги энг зўр футболчидир.

Шуҳратбек Жўраев суҳбатлашди.