Бундан бир неча кун олдин Грузиянинг Батуми шаҳрида 43-Бутунжаҳон шахмат Олимпиадаси ниҳоясига етган ва ушбу нуфузли мусобақада ўзбекистонлик ақл-идрок соҳиблари ҳам иштирок этишганди. Бу ҳақда МОҚ расмий сайти хабар бермоқда. 150 мамлакат вакиллари қатнашган шахмат Олимпиадаси якунларига кўра, эркаклар ва аёллар терма жамоаларимиз кучли йигирматаликка киришга муваффақ бўлгандилар.

Шу муносабат билан бугун, 10 октябрь куни Ўзбекистон шахмат федерациясида мазкур Олимпиадада иштирок этган спортчиларимиз иштирокида махсус тадбир ташкил этилди. Тадбир давомида Ўзбекистон шахмат федерацияси мутасаддилари иштирокида матбуот анжумани ҳам бўлиб ўтди. Анжуманда қатнашган оммавий ахборот воситалари ходимлари ўзларини қизиқтирган бир қатор саволларга жавоб олдилар. Шунингдек, шахмат Олимпиадаси иштирокчилари билан суҳбатлашдилар.

- 43-Бутунжаҳон шахмат Олимпиадасида муваффақиятли иштирок этдик. Ўз гуруҳимизда биринчи бўлдик. Бундан жуда хурсандмиз. Ҳали Ўзбекистон тарихида бундай натижа бўлмаганди. Ушбу мусобақада бешинчи маротаба иштирок этдим. Қизлар билан биргаликда Ўзбекистон шарафини муносиб ҳимоя қилдик деб ўйлайман. Мусобақа давомида Россия, Индонезия, Франция, Руминия каби терма жамоаларга қарши ўйин ўтказдик. Баҳслар давомида россиялик рақибим устидан қозонган ғалабам чиройли бўлди, – деди шахмат Олимпиадасида иштирок этган спортчимиз Нодира Нодиржонова.

Сўнгра 13 ёшида халқаро гроссмейстерга айланган Нодирбек Абдусатторов иштирокида шахмат сеанси ташкил этилди. Унда жаҳонда энг ёш гроссмейстер бўлиш бўйича иккинчи кўрсаткични қайд этган Нодирбек шахмат мухлислари билан учрашув ўтказди.

- Грузиянинг Батуми шаҳрида бўлиб ўтган Олимпиадада умумжамоа ҳисобида 16-ўринни эгалладик. Ўйлайманки, бу яхши натижа. Бундан кейинги Олимпиадаларда ҳам бундан яхшироқ натижа кўрсатиб, совринли ўринлар учун курашамиз. Мусобақада ҳар бир мамлакат ўзининг энг кучли шахматчилари билан иштирок этди. Украиналик шахматчиларга қарши учрашувлар қийин бўлди. Чунки, улар жаҳоннинг энг кучли терма жамоаларидан бири ҳисобланадилар, – деди Нодирбек Абдусатторов.

«SPORTS.uz» сайтида чоп этилган материаллардан нусха кўчириш, тарқатиш ва бошқа шаклларда фойдаланиш фақат таҳририят ёзма розилиги билан амалга оширилиши мумкин.

ТАҲРИРИЯТ ҲАҚИДА

Гувоҳнома: №1002. Муассис: «RENDER SYSTEMS» МЧЖ.

Таҳририят манзили: 100047, Тошкент шаҳри, Истиқбол кўчаси, 15-уй.
Электрон манзил: info@sports.uz.
Телефон: +998 71 233-78-98