АГМК футболчилари "Пахтакор"га қарши финал олдидан қандай фикрда?

Хабарингиз бор, “Пахтакор” ва АГМК жамоалари ўртасида Ўзбекистон кубоги финал учрашуви бўлиб ўтади. Финал олдидан ҳар иккала жамоа мураббийлари ва футболчилари иштирокида матбуот анжумани бўлиб ўтди.

Унда олмалиқликлар вакиллари Акмал Шораҳмедов, Владислав Касминин, Элгужа Григалашвили ҳамда Шаҳзод Нурматов иштирок этди ва ўз фикрлари билан ўртоқлашишди. Бу ҳақда клуб матбуот хизмати хабар берди.

Владислав Касминин: "Пахтакор" кучли жамоа. Эртанги рақиб жорий мавсумни аъло даражада ўтказмоқда. Аммо футболда иложсиз нарсанинг ўзи йўқ. Эртага максимал ҳаракат қилишга ва мухлисларимизни хурсанд қилишга уринамиз".

Элгужа Григалашвили: "Ассалому алайкум! (ўзбек тилида) Эртага қийин тўқнашув бўлади. "Пахтакор" жуда яхши жамоа. Умид қиламизки, барчаси биз учун яхши тугайди".

Акмал Шораҳмедов: "Менимча, эртага қизиқ ўйин бўлади. Сабаби, "Пахтакор" ўтган йил финалдаги мағлубият учун реванш олишга ҳаракат қилади. Гарчи чемпионатда пастроқ ўринда бўлсак ҳам кубок учун бор кучимизни бериб ўйнаймиз. Стадионга келадиган мухлисларни қизғин баҳс кутмоқда. Кучли жамоа ғолиб бўлсин".

Шаҳзодбек Нурматов: "Бизни оғир баҳс кутиб турганлиги билган ҳолда шунга яраша тайёргарлик кўрдик. Худо хоҳласа яхши натижага эришишга ҳаракат қиламиз. Муҳими, ғалаба қозонишимизга ишонамиз".