"Атлетико" Альваресни сотишга тайёр, аммо "Барселона"га эмас

Журналист Маттео Моретто маълум қилишича, "Атлетико" ҳужумчи Хулиан Альвареснинг трансфери бўйича тушаётган таклифларни кўриб чиқишга тайёр.

"Биринчи марта "Атлетико" Альварес билан хайрлашиш эҳтимолини жиддий ўргана бошлади ва унинг трансфери бўйича таклифларни эшитишга тайёр. Клуб раҳбарияти футболчини Испания чемпионатидан ташқари жамоага сотишни маъқул кўради. Шу маънода "Арсенал" қизиқиш билдирган клублар қаторида. Шу билан бирга, Хулианнинг ўзи учун асосий вариант сифатида "Барселона"га ўтиш қолмоқда. Жаҳон чемпионати якунлангач, каталонияликлар футболчини қўлга киритиш учун яна бир бор уриниши кутилмоқда", – дея таъкидлаган Моретто.

Эслатиб ўтамиз, Хулиан Альварес 2024 йилда "Манчестер Сити"дан "Атлетико"га 75 миллион евро эвазига ўтган. Унинг амалдаги шартномаси 2030 йил 30 июнига қадар мўлжалланган.