"Андижон" бу сафар "Шахтёр"га ҳеч қандай имконият қолдирмади

Александр Хомяков жамоаси 13 февраль кунги иккинчи учрашуви оқшомга яқин Анталиядаги “Титаник” номли майдонда ўтказилди. 29 январь санасида “Андижон” худди шу майдонда Украинанинг “Ворскла” клубига қарши майдонга тушиб 4:3 ҳисобида ғалаба қозонганди. Бу сафар Қозоғистоннинг “Шахтёр”и билан куч синашди ва устунликка эришганини амалда исботлади.

“Бургутлар” ўйинни жуда шиддатли ҳамда тажовузкор кўринишида бошлади ва деярли баҳс мобайнида ушбу жиҳатни ўз ўйинида сақлаб қола олди.

Майдонга кучли иштиёқ билан тушган "Андижон" аъзолари ҳар жабҳада рақибдан кучли эканлигини намойиш этди. Учрашувнинг кўп қисмида “Андижон” рақиб жарима майдони ичида бўлди ва хавфли вазиятларни яратди. Шу боис мазкур ўйинда “Шахтёр” дарвозабони ва ҳимоячиларига қийин бўлди. "Бургутлар" эса рақибга имконият қолдирмади.

“Андижон”нинг голлари учрашув охирларига яқин киритилди. Аввалига Абдулвоҳид Ғуломов ўз қанотидан тезлик билан олдинга борди ва марказга яқин жойдан Рустам Турдимуродовни тўп билан таъминлади. Ҳужумчи эса ўзи учун яратилган имкониятни голга айлантиришга эришди.

Орадан кўп ўтмасдан энди ярим ҳимоячи Илҳом Абдуғаниев ҳам рақиб дарвозасини ишғол қилди. Марказда Турдимуродов Абдуғаниевни пас билан таъминлади. Ҳимоячининг хатосидан кейин Илҳом узоқ масофадан рақиб дарвозасининг ожиз нуқтасини топа олди.

Шу тариқа, “Андижон” рақибига ҳеч қандай имконият қолдирмади ва ҳақли равишдаги ғалабага эришди.

Энди “Бургутлар”нинг навбатдаги учрашуви 17 февраль санасига белгиланган бўлиб, шу куни Польшанинг “Вишиста Краков” жамоасига қарши майдонга тушади.

 “Андижон” – “Шахтёр” (Қозоғистон) – 2:0 (0:0).

13 февраль. Анталия. “Титаник” стадиони.

Бош ҳакам: Сергей Ноженко 

Ёрдамчи ҳакамлар: Ринат Якбаров. Нуржан Жунусов.

Захира ҳаками: Сергей Султангалиев (барчаси – Қозоғистон).

 “Андижон”: Элдор Адҳамов, Абубакир Ашуров, Ислом Маматказин, Абдулвоҳид Ғуломов, Абдураҳмон Комилов, Шохжаҳон Ёрқинбоев, Алтин Крезиу, Илҳом Абдуғаниев, Сардор Азимов, Дониёр Абдуманнопов, Рустам Турдимуродов.

Захирадан майдонга тушганлар: Муҳаммадкарим Тоиров, Рустам Турдимуродов, Искандар Шойқулов.

“Шахтёр": Игорь Шацких, Михаил Габишев, Олжас Керимжанов, Александр Мигунов, Элхан Саидов, Мансур Дилмурат, Рафаэль Оспанов, Уалихан Мухаметжанов, Рифат Нурмугамет, Ансар Алтинхан, Айдос Таттибаев.

Голлар: Рустам Турдимуродов, 80 - 1:0. Илҳом Абдуғаниев, 84 – 2:0.