Аргентина - Ўзбекистон: Маскерано 20 йилдан сўнг яна ўзбекларга қарши. Ёхуд аламли мағлубият учун реванш вақти келди!

Эртага 20 май куни Аргентинада ёшлар ўртасида жаҳон чемпионати старт олади. Турнирнинг очилиш ўйинида Ўзбекистон терма жамоаси мезбон Аргентинага қарши майдонга тушади. “Сантьяго-дель-Эстеро” стадионида кечадиган баҳс Тошкент вақти билан соат 02:00 да бошланади.

Келинг ушбу учрашув олдидан жамоаларнинг ўтказган сўнгги 5 та учрашувида қайд этган натижаларига тўхталиб ўтамиз.

Аргентина ёшлар терма жамоаси охирги 5 та ўйининг 2 тасида ғалаба ва 3 тасида мағлубият қайд этган.

Аргентина – Япония (U19) 3:2

Парагвай – Аргентина 2:1

Аргентина – Бразилия 1:3

Аргентина – Перу 1:0

Колумбия – Аргентина 1:0

Энди эса ўзимизнинг қора кўзлар сўнгги 5 та ўйинда қандай натижалар қайд этганини ёдингизга солиб ўтамиз. Равшан Ҳайдаров шогирдлари охирги 5 та ўйинда бор йўғи 1 марта дуранг қайд этишган ва 4 тасида ғалаба қозонишган. Қайд этиш лозимки, ушбу ўйинларнинг барчаси Ўзбекистонда ўтган Осиё чемпионати доирасида бўлган.

Ироқ – Ўзбекистон 0:1

Ўзбекистон – Индонезия 0:0

Ўзбекистон – Австралия 1:1 (пен. 5:4)

Ўзбекистон – Ж.Корея 0:0 (пен. 3:1)

Ўзбекистон – Ироқ 1:0

Кўриниб турибдики, статистикада ҳам устунлик биз тарафда. Аммо ушбу жамоалар, яъни Аргентина ва Ўзбекистон ёшлар терма жамоалари 2003 йил Бирлашган Араб Амирликларида ўтказилган мундиалда бир гуруҳдан жой олишган ва уларнинг ўзаро тўқнашувида 2:1 ҳисобида аргентиналикларнинг қўли баланд келган. Ўша ўйиннинг 4-дақиқасидаёқ Александр Гейнрих гол уриб терма жамоамизни ҳисобда олдинга олиб чиққан эди, аммо аргентиналиклар ўйин сўнггига қадар 2 та гол уриб якунда ғалабани тантана қилишган.

Ушбу ўйин билан боғлиқ яна бир қизиқ жиҳат, бундан роппа-роса 20 йил муқаддам ўтказилган ўйинда аргентиналикларнинг амалдаги бош мураббийи Хавьер Маскерано футболчи сифатида терма жамоамизга қарши майдонда ҳаракат қилган.

Умид қиламизки, терма жамоамиз бўлажак ўйинда Аргентина устидан ғалабага эришиб, ушбу аламли мағлубият учун муносиб реванш олишади.

Эслатиб ўтамиз, терма жамоамиз жой олган “А” гуруҳида Аргентинадан ташқари Гватемали ҳамда Янги Зелландия терма жамоалари ҳам бор.

Бахтиёр ТОШТЕМИРОВ