Бангладеш чемпионатида бошқаларга ўрнак бўлаётган футболчимизни биласизми?

Ҳозирда хорижда фаолият олиб бораётган ўзбекистонлик футболчилар талайгина. Улар турли мамлакатларда легионер мақомида тўп суриб келмоқдалар. Ўйнаётган чемпионатининг мавқеи қай даражада бўлишидан қатъий назар муҳими улар ўзидан илиқ таассурот қолдиришга ҳамда ишончни оқлашга ҳаракат қилишаётгани айни ҳақиқат.

Масалан, Осиёнинг турли нуқталарида ҳам ҳамюртларимизни учратиш мумкин. Айтайлик, Бангладеш чемпионатида ҳам бир қатор ўзбекистонлик футболчилар ўз омадларини синаб юрибдилар. Уларнинг орасида эса мухлисларимиз яхши биладиган футболчиларни ҳам учратиш мумкин.

Бу борада гап кетар экан, ишқибозларга яхши таниш бўлган наманганлик Отабек Валижоновга ҳам тўхталиб ўтиш ўринли бўларди. Боиси, ушбу ўйинчи “Навбаҳор” клуби тарбияланувчиси ҳисобланади ва чемпионатимиздаги фаолияти мобайнида ўзидан яхши таассурот қолдира олган ўйинчилардан ҳисобланади. Лекин кейинчалик тақдир уни Бангладеш томонларга етаклади. Ҳозирда эса Валижонов маҳаллий “Бронхрс Юнион” жамоаси шарафини ҳимоя қилиб келмоқда.

Айтиш лозимки, Отабек бунга қадар “Навбаҳор”, “Шўртан”, “Андижон”, АГМК, “Сўғдиёна” сингари клубларда тўп сурган. Охирги йилларда эса легионер мақоми остида Бангладеш чемпионатида иштирок этиб келмоқда. Албатта, айни пайтда у ерда ҳам коронавирус туфайли карантин жорий этилган. Ҳамюртимиз эса Бангладешдаги ҳолат, легионерларга бўлган эътибор, олдинги фаолияти каби бир қатор масалаларда ўзининг фикрлари билан ўртоқлашди.

У ердаги карантин хусусида

- Бу ерда ҳам карантин ва шунга риоя қилган ҳолда уйда ўтирибмиз. Шароитларга келадиган бўлсак, ҳаммаси жойида, камчиликлар йўқ. Худога шукр, биз учун барча шароитлар яратиб берилган. Тўғриси ҳозирги пайтда Аллоҳдан бало юқмаслигини сўраб кўчага чиқмасдан уйда ўтирибмиз.

Легионерларнинг шартномалари муддатидан аввал бекор қилинадими?

- Албатта, карантиндан кейин кимларнидир шартномалари бекор бўлар экан, деган гапларни эшитгандим. Бизда 5-тур баҳслари тугаган эди. Қайсидир легионерларнинг шартномалари эса май ойида тугайди. Мана шу тўғрисида гап-сўз чиқди. Лекин футбол федерациясининг бу борадаги алоҳида қарори чиқди. Унга кўра биринчи даврада ўйнаган легионер футболчи ўша даврани якунлаб қўйиши керак. Ана шундан кейингина унинг клуби таркибида ўзгаришларни қила олиши мумкин.

Бангладешда легионерларга қанча ҳақ тўланади?

- Худога шукрки, бу ердаги ойлик маошим насибага яраша. Аллоҳ шу ерда ризқимни берган экан, меҳнат қилиб, менга берган эътиборни оқлашга ҳаракат қиляпман ва олаётган маошимни ҳалол қилиб юрибман. Легионерларга келадиган бўлсак, ким қанча ойлик маош олишига қизиқмаганман. Лекин бу ерда хорижлик футболчиларга катта эътибор берилаётгани рост. Ўзимиздаги маош билан таққослайдиган бўлсак, бу ерда АҚШ доллари оласиз, ўзимизда эса сўм, фарқи мана шунда (кулади).

Унинг фаолиятидаги унутилмас жамоа қайси?

- Очиғини айтадиган бўлсам, бу ҳақида олдин ҳам айтгандим, мен учун унутилмас, қадрли бўлиб қолган ва ёқимли хотиларга бой бўлган жамоам - бу “Навбаҳор”. Бу ерда ўтказган фаолиятим ҳақида гапирсам гапим ҳали бери тугамаса ҳам керак.

Олдинги фаолияти ва Бангладеш футболининг мавқеи ҳақида

- Агар ёдингизда бўлса, 2016 йили “Андижон”да тўп сурганимда оёғимдан жароҳат олгандим. Ана шу жароҳат менга қийинчилик туғдирган. Шундан кейин АГМК ва “Сўғдиёна” жамоаларида тўп сурдим. Биласизми, менга ўша пайтларда ҳам Бангладеш чемпионатидан чақирувлар бўлиб турганди. Агарда бу ердаги чемпионатнинг савияси паст деб ўйлаётган бўлсангиз адашасиз. Мен савияси баланд ёки паст чемпионатда ўйнаяпман деб ўйламаганман. Умуман олганда, савияга келадиган бўлсак, ўзимизники билан катта фарқи йўқ. Оёғимдаги жароҳатимни яхшилаб даволатгач, шу ерга келишга қарор қилганман. Худога шукрки, Ўзбекистонда ўйнаган пайтимда кўплаб мухлис орттирдим, футбол орқали талайгина дўстларга эга бўлдим. Мана, энди Бангладешдаман ва бу ерда ҳам “Навбаҳор”даги каби мухлисларимга эгаман. Қаерда бўлса ҳам сиз меҳнат қилиб, ажойиб ўйинлар кўрсатсангиз у ерда сизга бўлган меҳр-муҳаббат ошаверади. Худога шукрки, мен учун ҳаммаси яхши. Балки янги мавсумда фаолиятимни бошқа чемпионатда бошларман.