“Барса” футболчиси ўзини ҳайратга солган жамоа номини айтди

“Барселона” ярим ҳимоячиси Педри Европа Чемпионлар лигасининг жорий мавсумила ўз жамоаси  учун энг жиддий рақиб ким экани ҳақидаги саволга жавоб берди.

- Биринчи навбатда – бу амалдаги чемпион “Пари Сен-Жермен”. “Арсенал” ҳам жуда кучли шаклланиб бўлган жамоа.

Шунингдек, “Манчестер Сити” ва  “Реал Мадрид”ни доимо асосий фаворитлар қаторига қўшган бўлардим.

Мени жуда ҳайратда қолдирган кучли жамоа эса, дўстим Тринкау тўп сурадиган Лиссабоннинг “Спортинг”идир. Улар чиройли футбол намойиш этмоқда, - деди Педри Esquire нашри журналистларига.

Чемпионлар лигасининг умумий босқичи якунланишига икки тур қолган паллада, “Барселона” 6 ўйиндан 10 очко жамғариб, 36 клуб ичида 15-ўринни эгаллаб турибди. Жамоа 1/8 финалга тўғридан-тўғри йўлланма берувчи кучли саккизликдан  икки очко ортда қолмоқда.

Турнир жадвалининг юқори тўртлигини юз фоизлик натижа (18 очко) билан “Арсенал”, “Бавария”(15 очко), амалдаги ғолиб ПСЖ (13 очко) ва “Манчестер Сити” (13 очко) банд этган.

Мадриднинг «Реал» клуби 12 очко билан еттинчи поғонада, “Спортинг” эса “Барселона” билан бир хил очкога эга бўлса-да, тўплар нисбатидаги устунлик эвазига 14-ўринда бормоқда.